Адыгеим и ЛIышъхьэ зэкIолIэгъэ чIыпIэхэм ащыщ поселкэу Майскэм щашIырэ культурэм и Унэ.

Проектым иедзыгъохэр гъэцэкIагъэ зэрэхъухэрэм республикэм ипащэрэ подряднэ организацием илIыкIохэмрэ тегу­щыIагъэх. Фирмэу «Марк-Сервис» зыфиIорэм ипащэ къызэриIуагъэмкIэ, проектым къыдыхэлъытагъ квадрат метрэ 2200-рэ зэрылъ псэуалъэм ишIын. Ащ чIыпIэ 200 зиIэ актовэ залрэ тхылъеджапIэрэ къыдыхэлъытэгъэщт. Джырэ уахътэм ехъулIэу объектым итехническэ ухьазырыныгъэ процент 33-рэ мэхъу. Илъэсым ыкIэм ехъулIэу IофшIэнхэр аухынхэу агъэнафэ.

Адыгеим культурэмкIэ иминистрэ игуадзэу Кушъу Светланэ къызэриIуагъэм­кIэ, къоджэ псэупIэм дашIыхьэрэ псэ­уалъэм сомэ миллион 80 фэдиз пэIуагъэ­хьащт, оборудованиеу къащэфыгъэм сомэ миллиони 3,5-м ехъу тефагъ.

Джащ фэдэу шъолъырым ипащэ селоу Вольнэм зыщэIэм мыщ дэт культурэм и Унэ Iоф зэришIэрэм зыщи­гъэгъозагъ, къулыкъушIэхэм ыкIи кIэлэ­цIыкIухэм гущыIэгъу афэхъугъ. Куль­турэм иучреждениехэм яматериальнэ-техническэ зытет нахьышIу шIыгъэнымкIэ ыкIи творческэ объединениехэм IэпыIэгъу афэхъугъэнымкIэ Адыгеим и ЛIышъхьэ АР-м культурэмкIэ и Министерствэрэ чIыпIэ администрациемрэ пшъэрылъ гъэнэфагъэхэр афишIыгъэх.

— Къуаджэхэм адэт культурэм и Унэхэм мэфэкI Iоф­тхьабзэхэр зэращыкIохэрэм, творчествэм пылъхэр зэращызэрэугъоихэрэм имызакъоу, цIыфхэр ащызэIокIэх, зэдэгущыIэх, зэхахьэхэр ащэкIох. ЦIыфхэм мыщ зыщагъэпсэфын, яуахътэ шIуагъэ къытэу ща­гъэкIон алъэкIыщт. Къоджэ­дэс­хэмкIэ ащ мэхьанэшхо иI, — къыIуагъ КъумпIыл Мурат.

Къоджэ чIыпIэхэм хэхъоныгъэ ашIыным, демографием иIофыгъохэм анахьэу анаIэ тырагъэтыным непэ мэхьанэшхо зэриIэр Адыгеим и ЛIышъхьэ кIэухым хигъэунэфыкIыгъ.

— Къуаджэм дэлъ щыIакIэр нахьышIу шIыгъэнымкIэ бэ тшIэрэр. А пстэури цIыфхэм афэIорышIэн фае. Лъэпкъ проектхэм, программэхэм, ащ ахэхьэ сабый зэрыс унагъохэм IэпыIэгъу афэхъуным фытегъэ­псыхьагъэхэм, амалэу къатыхэрэр чIыпIэхэм къызфагъэфедэным мэхьанэшхо иI, — къы­Iуагъ КъумпIыл Мурат.

Адыгеим и ЛIышъхьэ ипресс-къулыкъу.