КIэлэеджакIохэм ыкIи кIэлэегъаджэхэм ягъэмэфэ зыгъэпсэфыгъо уахътэ аублагъ нахь мышIэми, проектэу «Билет в будущее» зыфиIорэм иIофшIэн зэпагъэурэп. НыбжьыкIэхэм ящыIэныгъэ гъогу зэрапхын алъэкIыщт сэнэхьатхэр аушэтых, нахь зыфэщэгъэ лъэныкъохэр къыхахых.

Бэдзэогъум и 4-м зэхащэгъэ онлайн- къэтыным Мыекъуапэ дэт лицееу N 19-м ия 10-рэ класс щеджэрэ Михаил Назаренкэмрэ ащ икIэлэегъаджэу Фатима Кадыровамрэ хэлэжьагъэх. Проектым шIуагъэу пылъыр ахэм къаIотагъ. Михаил проектым хэлэжьэнэу зэрэхъугъэр, сэнэхьат зэфэшъхьафхэр зэригъэшIэн амал иIэ зэрэхъугъэр, янэ-ятэхэм проектым еплъыкIэу фыряIэр, тестэу къатыхэрэр иунагъо игъусэу къызэришIыгъэхэр къыIотагъ.

— Проектым нэIуасэ сызыфишIыгъэ сэнэхьатхэм ащыщэу «Логист» зыфиIорэм сыгукIэ нахь сыфэщагъэу къыхэсхыгъ. Проектэу «Билет в будущее» зыфиIорэм ишIуагъэкIэ мы сэнэхьатым сищыIэныгъэ еспхынэу исхъухьагъ, платформэм щыскIугъэ тестхэм ар тэрэзэу къызэрэхэсхыгъэр къаушыхьатыжьыгъ, — еIо Михаил Назаренкэм.

КIэлэегъаджэу Къадыр Фатимэ къызэриIуагъэмкIэ, кIалэм къыхихыгъэ сэнэхьатэу «Логистыр» лъэныкъоу «Iэрыфэгъу щыIакIэр» зыфиIорэм епхыгъ. ПсэолъэшIынымкIэ, архитектурэмкIэ, транспорт инфраструктурэмкIэ, энергетикэмкIэ ыкIи ресторан бизнесымкIэ, гъомылэпхъэ технологиехэмкIэ ар агъэ­федэ.

Проектэу «Билет в будущее» зыфиIорэм зэкIэмкIи лъэныкъуи 8-мэ япхыгъэ сэнэхьат 362-рэ хэхьэ.

Тишъолъыр нахь щагъэфедэрэ сэнэхьатхэр ары республикэм къыщыхахыхэрэр. Адыгеим хэхъоныгъэхэр ышIыхэ къэс лъэныкъохэм нахь зырагъэушъомбгъущт.

ДЕЛЭКЪО Анет.