ШIэныгъэлэжь ныбжьыкIэхэм язэIукI
ШIэныгъэлэжь ныбжьыкIэхэм я Вавиловскэ еджапIэу «Урысые Федерацием исхэм ягенетикэ къызэтегъэнэжьыгъэныр ыкIи гъомылэпхъэ щынэгъончъагъэ щыIэныр» зыфиIорэр мы мафэхэм зэхащагъ. Апэрэу Адыгэ къэралыгъо университетыр кIэщакIохэм ащыщ хъугъэ.
Iофтхьабзэм шIэныгъэлэжь ныбжьыкIэ 27-рэ хэлэжьагъ. Ахэр Москва, Санкт-Петербург, Якутскэ, Новосибирскэ хэкум, Краснодар краим ыкIи Адыгеим щыщых. Ахэм ахэтых АКъУ-м естествознаниемкIэ ифакультет истудентхэу Алина Терещенкэр, Еутых СултIан, Наталья Бондаренкэр, Александра Остриковар, Елизавета Албатенкэр.
Iофтхьабзэм хэлажьэхэрэр мэкъумэщ культурэхэм нэIуасэ афэхъугъэх. Ащ ишIуагъэкIэ теоретическэ лъэныкъом имызакъоу Вавиловскэ коллекциер зыщыщыр зэрагъэшIагъ, лабораториехэм ачIэхьагъэх.
Урысыем гъомылэпхъэ щынэгъончъагъэ илъыным пае мэкъумэщ культурэхэм япхыгъэ селекцием Iофтхьабзэм мэхьанэ ин щыратыгъ. Джащ фэдэу IэкIыбым къыращырэ продукциер тэтыемкIэ зэблэхъугъэным иIофыгъуи тегущыIагъэх.