Унагъом, шIулъэгъум ыкIи шъыпкъагъэм я Мафэ мэфэкI шIыкIэм тетэу Пушкиным ыцIэ зыхьырэ лъэпкъ унэм щыхагъэунэфыкIыгъ. АР-м IофшIэнымкIэ ыкIи социальнэ хэхъоныгъэмкIэ и Министерствэ ащ кIэщакIо фэхъугъ.

Мы мэфэкI дахэр зыщыIэр бэшIагъэ, ау 2022-рэ илъэсым УФ-м и Президент иунашъокIэ, апэрэу официальнэу хагъэунэфыкIыгъ. Джащ фэдэу мыгъэ Адыгеир илъэси 100 зэрэхъурэм къыдыхэлъытагъэу, илъэс 25-м шIокIэу къызэдэзгъэшIэгъэ унэгъуи 100 Iофтхьабзэм щагъэ­шIуагъэх, унагъом иджэныкъо машIо мыкIосэным емызэщыжьэу фэбанэхэрэм шIэжь медалэу «За любовь и верность» зыфиIорэр аратыгъ.

МэфэкI Iофтхьабзэм къырагъэблэгъагъэхэм гущыIэ фабэхэмкIэ закъыфигъэзагъ АР-м IофшIэнымкIэ ыкIи социальнэ хэхъоныгъэмкIэ иминистрэ иапэрэ гуадзэу Ирина Ширинам.

— Непэ мыщ къыщызэрэугъоигъэ унагъохэр шIулъэ­гъум, цыхьэшIэгъу пкъэум, кIэлэпIуным ищысэтехыпIэх. Мыхэр илъэс 25-м къыщегъэжьагъэу ыкIи ащ нахьыбэу щыIэныгъэ гъогум зэдытетых. Анахьыбэрэ зэкIыгъугъэ зэшъхьэгъусэхэм илъэс 63-рэ къызэдагъэшIагъ. Адыгеим къэралыгъо гъэпсыкIэ зиIэр илъэси 100 зэрэхъу­рэм фэдэу унэгъуи 100 дгъэшIонэу къедгъэблэгъагъ, ахэм зэкIэми медальхэр, щытхъу тхылъхэр, шIухьафтынхэр яттыщтых, — къыIуагъ Ирина Ширинам.

Нэужым зэгурыIожь зэшъхьэгъусэхэм къафэгушIуагъ граждан Iофхэм язытет тхыгъэнымкIэ АР-м и ГъэIорышIапIэ ипащэу А Лариса Волчановскаяр.

— Унагъом имэхьанэ зыкъе­гъэIэтыгъэным ыкIи ащ IэпыIэгъу фэхъугъэным мы уахътэ къэралыгъом ынаIэ тырегъэты. УФ-м и Конституцие аужырэ зэхъокIыныгъэу фашIыгъэхэм къагъэнафэ хъулъфыгъэмрэ бзылъфыгъэмрэ язэгурыIоныгъэ унагъом ылъапсэ зэригъэ­пытэрэр. Унэгъо пытэр — къэ­ралыгъом ылъапс. Илъэс зэкIэ­лъыкIохэм азыфагу илъ лъытэныгъэр, зэфыщытыкIэр агъэпытэзэ щыIэныгъэ гъогум зэдытет зэшъхьэгъусэхэм сыгу къыздеIэу сафэгушIо. Унагъом иджэныкъо машIо зымыгъэкIуа­сэхэрэр унэгъо ныбжьыкIэхэм щысэшIу афэхъунхэу сафэ­ъаIо, — къыIуагъ ащ.

Iофтхьабзэр муниципальнэ творческэ купхэм къагъэхьазырыгъэ мэфэкI концертым къыгъэбаигъ.

Iэшъынэ Сусан. Сурэтыр Iэшъынэ Аслъан тырихыгъ.