Адыгеим ис кIэлэеджэкIо анахь дэгъу мин 1,2-м ехъумэ ыпкIэ хэмылъэу тишъо­лъыр зыщагъэпсэфын алъэкIыщт. Я 5 — 9-рэ классхэм арыс кIэлэеджакIохэу къыхагъэщыгъэхэм загъэпсэфын алъэ­кIы­нэу социальнэ сертификатхэр ара­тыщтых.

Шъугу къэдгъэкIыжьын, Адыгеир пилотнэ шъолъырхэм ахэхьагъ, ащ къыдыхэлъытагъэу мы илъэсым къыщегъэжьагъэу ыпкIэ зыхэмылъ сертификатхэр кIэлэеджакIохэм аратхэу рагъэжьагъ. ЗекIонымкIэ фэIо-фашIэхэм ягъэцэкIэн къыдыхэлъытагъ ахэм Адыгэ Респуб­ликэм зыщагъэпсэфыныр. Ащ хахьэ жъогъуи­щым нахь мымакIэ зиIэ хьакIэщым чэщ-зымафэм къыщегъэжьагъэу зэрэчIагъэсыщтхэр, сыхьатиплI пэпчъ зэрагъэшхэщтхэр. Джащ фэдэу гидыр ягъусэу чIыпIэ дахэхэр къарагъэплъыхьащтых, зыгъэпсэфыпIэхэм ыпкIэ хэмылъэу ащэщтых ыкIи къащэжьыщтых.

АР-м зекIонымкIэ ыкIи зыгъэпсэфыпIэхэмкIэ и Комитет къызэрэщаIуагъэмкIэ, 2022-рэ илъэ­сым нэбгырэ 1259-мэ сертификатхэр аратыщтых. Ахэр зытырагощэщт кIэлэцIыкIухэр:

— еджэнымкIэ гъэхъагъэ зышIыгъэхэр, сэнаущыгъэ зыхэлъхэр;

— зэгурыIоныгъэ зэрымылъ ыкIи гъот макIэ зиIэ унагъохэм къарыкIыгъэхэр;

— муниципальнэ, республикэ ыкIи урысые олимпиадэхэм, зекIо-краевед мэхьанэ зиIэ зэнэкъокъухэм текIоныгъэ къащыдэзыхыгъэхэр.

Социальнэ сертификатыр къыратынымкIэ къэралыгъо фэIо-фашIэхэм ягъэцэкIэн епхыгъэ лъэIу тхылъыр атын алъэкIыщт ежь кIэлэцIыкIухэм, ахэм янэ-ятэхэм, зыныбжь имыкъугъэхэм алъыплъэхэрэм, гъэсэныгъэ организациехэм ялIыкIохэм.

ЫпкIэ хэмылъэу кIэлэцIыкIухэр зекIо кIонхэм епхыгъэ проектыр Урысыем ишъолъыр заулэмэ ащагъэцакIэ. АдыгеимкIэ мы Iофым фэгъэзагъэх АР-м зекIонымкIэ ыкIи зыгъэпсэфыпIэхэмкIэ и Комитетрэ IофшIэнымкIэ ыкIи социальнэ хэхъоныгъэмкIэ и Министерствэрэ. Ведомствэ пэпчъ шэпхъэ-правовой актым ипроект ыгъэхьазырыгъ, мы уахътэм ехъулIэу экспертизэ ашIы. Ар заушэтыкIэ сертификатым итын рагъэжьэщт. Мы фэIо-фашIэр Урысыем апэрэу щагъэцакIэ, ащ къыхэкIэу документхэм ягъэхьазырын шъолъырхэм къин къыщыхъугъ. Арэу щытми, Iофыр гъэцэкIагъэ хъугъэ.