Медицинэ учреждениехэм ахэхъо
Программэу «АР-м псауныгъэр къэухъумэгъэнымкIэ икъулыкъу гъэкIэжьыгъэныр» зыфиIорэм къыхиубытэу медицинэм иучрежденииплI 2022-рэ илъэсым ашIын гухэлъ щыI.
Мыекъуапэ ирайон цIыкIоу Восходым, поселкэу Инэм поликлиникакIэхэр къащашIых, къуаджэу Джэджэхьаблэ ыкIи поселкэу Дружбэм амбулаториехэр ащагъэпсынхэу ыуж ихьагъэх. IофшIэнхэр 2023-рэ илъэсым ыкIэм нэс аухынхэу щыт. Поселкэу Каменномостскэм дэт поликлиникэм игъэкIотыгъэ гъэцэкIэжьынхэр рашIылIагъэх.
IофшIэнхэм къадыхэлъыта-гъэу унашъхьэхэр, электричествэм ирыкIуапIэхэр зэблахъугъэх, гъэфэбапIэхэр ыкIи поликлиникэм ыкIоцI агъэцэкIэжьы- гъэх.
— Каменномостскэм дэт поликлиникэм игъэцэкIэжьын сомэ миллион 18,1-рэ пэIухьанэу агъэнафэ. Джырэ уахътэм джэхашъохэр, унашъхьэр зэблахъугъэх, — еIо Мыекъопэ район сымэджэщым иврач шъхьаIэу Алла Чернышовам.
Мы илъэсым IофшIэнхэр аухынхэшъ, сымаджэхэр мыщ къекIолIэнхэ амал яIэ хъужьыным щэгугъых. Поликлиникэм рашIылIэгъэ игъэкIотыгъэ гъэцэкIэжьынхэм яшIуагъэкIэ ар нахь зэтегъэпсыхьагъэ хъущт.