Лъэпкъ проектэу «Культурэм» къыдыхэлъытагъэу Шэуджэн районым ит поселкэу Тихоновым дэт тхылъеджапIэм игъэкIотыгъэ гъэцэкIэжьынхэр рашIылIагъэх. Ащ сомэ миллиони 5,56-рэ пэIуагъэхьащт, сомэ миллиони 5-р федеральнэ бюджетым, сомэ мин 50,6-р республикэ бюджетым къытIупщыгъ, адрэр республикэ ыкIи муниципальнэ бюджетхэм къахэхыгъ.

ТхылъеджапIэм иинагъэ хагъэхъуагъ ыкIи нэмыкIэу зэтыраутыжьыгъ. Джы узэрэчIэхьащтыр, куп зэхэтхэм Iоф зыщашIэн алъэкIыщтыр, кIэлэцIыкIухэр къызэкIолIэщтхэр, Iофтхьэбзэ зэфэшъхьафхэр зыщызэхащэщтхэр, компьютерхэр зычIэтыщтхэр, уизакъоу узыщеджэн плъэкIыщт чIыпIэр гощыгъэх.

— ЧIыпIэхэр дгъэнафэхэ зэ­хъум къекIуалIэхэрэм ящыкIагъэхэр ары анахьэу къыдэтлъытагъэр. Джырэ лъэхъан диштэу титхылъеджапIэ гъэпсыгъэ хъугъэ. Поселкэм щыпсэухэу, тхылъеджапIэм къакIохэрэм анкетирование ядгъэшIыгъ. «ТхылъеджапIэм зэрифэшъуашэу Iоф ышIэным пае сыда ищыкIагъэр?» зыфиIорэ упчIэм иджэуапхэм ащыщэу апэрэ чIыпIэр зыубытыгъэр Интернетыр ыкIи Wi-Fi къещэлIэгъэнхэр ары. Ащ ыуж тхылъ гъэшIэгъонхэр чIэлъынхэ, джырэ уахътэ диштэрэ оргтехникэкIэ зетегъэ­псыхьэгъэн, компьютер классхэр иIэнхэ зэрэфаер къа­Iуагъ. ГъэцэкIэжьынхэр зэрищыкIэгъагъэри бэмэ къыхагъэщыгъ, — еIо поселкэу Тихо­новым дэт къоджэ тхылъеджапIэм ипащэу Марина Кондра­тьевам.

— Лъэпкъ проектэу «Культурэм» ифедеральнэ проектэу «Культурная среда» зыфиIорэм къыдыхэлъытагъэу IофшIэнхэр дгъэцэкIагъэх. Сомэ миллиони 2,04-рэ зытефэгъэ тхылъ 3143-рэ къэтщэфыгъ. Муниципальнэ ахъщэмкIэ интерактивнэ Iэмэ-псымэхэр, тхылъеджа-­пIэр зэрагъэкIэрэкIэщтхэр зэдгъэгъотыгъэх, — еIо Шэуджэн районым культурэмкIэ и ГъэIорышIапIэ ипащэу Къэрэбэт Айдамыр.

Аужырэ шапхъэхэм адиштэу зэтырагъэпсыхьажьыгъэ тхылъеджапIэм кIэ­лэцIыкIухэм, ныбжьыкIэхэм, нахьыжъхэм апае Iофтхьэбзэ зэфэшъхьафхэр щызэхащэщтых. Ар цIыфкIуапIэ хъунэу, ежь поселкэм щыпсэухэрэм ямызакъоу гъу­нэгъу псэупIэхэми къарыкIхэзэ къекIо­лIэнхэу мэгугъэх.