ИлъэсыкIэ еджэгъум ехъулIэу къоджэ псэупIэхэм адэт еджапIэхэм ягъэкIэжьын пшъэрылъ шъхьаIэхэм ащыщ. ПIалъэм ехъулIэу спортивнэ зал 13 агъэцэкIэжьыщт. Ахэм сомэ миллион 27-м ехъу апэIуагъэхьащт.

Ащ нэмыкIэу, мы илъэсым къыщегъэ­жьагъэу еджапIэхэм игъэкIотыгъэ гъэцэкIэжьынхэр яшIылIэгъэнхэмкIэ илъэситф пIалъэ зиIэ федеральнэ программэм игъэцэкIэн аублагъ. Ащ къыдыхэлъытагъэу 2022-рэ илъэсым тирес­публикэ ит еджэпIи 9, къихьащт илъэсым учреждении 7 агъэцэкIэжьын гу­хэлъ щыI.

Мыщ епхыгъэ IофшIэнхэм анаIэ атырагъэтынэу муниципальнэ образованиехэм япащэхэм пшъэрылъ афишIыгъ АР-м и Премьер-министрэ иIэнатIэ зыгъэцэкIэрэ КIэрэщэ Анзаур. — ИлъэсыкIэ еджэгъум зэкIэ еджапIэхэр фэхьазырынхэм фэшI гъэцэкIэжьынхэр зэрэлъыкIуатэхэрэм зэрифэшъуашэу шъуалъыплъэн фае. 2024-рэ илъэсым игъэкIотыгъэ гъэцэкIэжьынхэр зэрашIылIэщт еджапIэхэм якъыхэхын бэдзэогъу мазэм едгъэжьагъ. Муниципалитетхэмрэ ведомствэхэмрэ мы Iофым чанэу хэлэжьэнхэ фае. Республикэм ит еджапIэхэм янахьыбэм игъэкIотыгъэ гъэцэкIэжьынхэр арашIылIэнхэу Адыгеим и ЛIышъхьэ пшъэрылъ къытфишIыгъ, — къыIуагъ А. КIэращэм.