Къэорэ пкъыгъор къагъотыгъэп
Хьыкумым иунэхэм ыкIи сатыу гупчэм къэорэ пкъыгъор ачIэлъэу къэбар нэпцIыр зыгъэIугъэр Адыгеим ихэбзэухъумэкIо къулыкъухэм агъэунэфы.
КъулыкъушIэхэм унэхэр къызалъыхъум къэорэ пкъыгъор ачIэмылъэу къычIэкIыгъ.
2022-рэ илъэсым бэдзэогъум и 5-м Адыгеим ихэбзэухъумэкIо къулыкъухэм къэбар къаIэкIэхьагъ хьыкумым иунэхэу ыкIи сатыу гупчэу Мыекъуапэ дэтхэм къэорэ пкъыгъор ачIэлъэу. Урысыем хэгъэгу кIоцI IофхэмкIэ и Министерствэ иотделэу Мыекъуапэ щыIэм мы хъугъэ- шIагъэмкIэ псынкIэу уплъэкIун Iофтхьабзэхэр зэхищагъэх.
Муниципальнэ образованиеу «Къалэу Мыекъуапэ», хьыкум учреждениехэр, сатыу гупчи 4 ыкIи ащ къыпэгъунэгъу унэхэр къызалъыхъухэм къэорэ пкъыгъор къачIагъотагъэп. Мы уахътэм хэбзэухъумэкIо къулыкъухэм оперативнэ ыкIи лъыхъун Iофтхьабзэ тедзэхэр лъагъэкIуатэ.
Адыгеим иполицие шъугу къегъэкIыжьы, УФ-м и Уголовнэ кодекс истатьяу 207-м «Терроризмэ нэшанэ зиIэ къэбар нэпцIыр зыгъэIурэм ехьылIагъ» зыфиIорэм къызэригъэнафэу мыщ фэдэ бзэджэшIагъэ зезыхьагъэм илъэси 10-м нэс хьапс тыралъхьан алъэкIыщт.