Ом къыздихьыгъэ гумэкIыгъо­хэр дэгъэзыжьыгъэнхэм ыкIи электричествэр псэупIэхэм афызэтегъэуцожьыгъэным яIофыгъохэм афэгъэхьыгъэ зэхэсыгъо АР-м и ЛIышъхьэу Къум­пIыл Мурат тыгъуасэ зэхищагъ.

Шъугу къэдгъэкIыжьын, блэ­кIыгъэ тхьаумафэм, гъэтхапэм и 10-м, шыблэр зыхэт ощхышхом ошъур дыхэтэу, жьыбгъэм илъэ­шыгъэ нэгъэупIэпIэгъум метрэ 21-м фэдизэу Мыекъуапэ ыкIи Мыекъопэ районым ащыIагъэхэм апкъ къикIыкIэ электричествэм ирыкIуапIэхэр зэпичыгъэх, унашъхьэхэм ащыщхэр тыритхъыгъэх, чъыгхэр рикIыкIыгъэх, цIыфхэм яхатэхэр зэхиубэта­гъэх. Анахь шъхьаIэр — цIыф хэкIодагъэп.

УФ-м ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ипащэу Станислав Илющенкэм къызэриIуагъэмкIэ, щагу 29-мэ псыр адэхьагъ.

Мыекъопэ къэлэ администрацием ипащэу Геннадий Митрофановым къызэриIуагъэмкIэ, анахьэу гумэкIыгъор зылъыIэсыгъэр къалэм игупчэрэ икъо­хьэпIэ лъэныкъорэ ащыпсэухэ­рэр ары. ПстэумкIи унэгъо 900-мэ ыкIи фэтэрыбэу зэхэт унэ 20-мэ ачIэсхэм электричествэр ямыIэу къэнэгъагъэх.

Бэдзэогъум и 12-м пчэдыжьым ехъулIэу щагухэм псыр адащыгъ, чIыпIэ 58-мэ чъыгхэр ащырахыкIыгъэх, нэфрыгъозэ 11-у кIосагъэхэм ащыщэу 4-мэ яIофшIэн рагъэжьэжьыгъ. IофшIэнхэм янахьыбэр зэшIуа­хыгъэх нахь мышIэми, электроэнергиер зэрямыIэмкIэ, яунашъхьэхэр зэрэзэхэкъута­гъэмкIэ цIыфхэм джыри даохэр яIэх.

Къоджэ псэупIэхэм ячIыпIэ пстэуми электричествэр нахь псынкIэу зыпкъ ащарагъэуцожьынэу, лъэIу тхылъэу ищыкIагъэмэ кIочIэ тедзэхэр ыкIи амалхэр агъэфедэнхэу Адыгеим и ЛIышъхьэ къафигъэпытагъ.

Электроэнергием икъэтын епхыгъэ IофшIэнхэр зэкIэ непэ ухыгъэнхэ зэрэфаер республи­кэм ипащэ хигъэунэфыкIыгъ.

— Ошъум пэшIуекIогъэнымкIэ къулыкъум амалэу ыкIи кIуачIэу IэкIэлъхэр гъэфедэ­гъэнхэм мэхьанэшхо иI. Адыгэ Республикэм и Мафэхэу ФедерациемкIэ Советым икIыгъэ тхьамафэм щыкIуагъэхэм мы Iофыгъор къащытIэтыгъ, — къыIуагъ КъумпIыл Мурат.