Мы мафэхэм къалэу Мыекъуапэ ищагухэм кIэлэцIыкIу джэгупIэхэр къащызэIуахыгъэх. Зыныбжь имыкъугъэхэм ягъэмэфэ зыгъэпсэфыгъо уахътэ гъэшIэгъонэу щагъэкIоным ахэр фытегъэпсыхьагъх.

Мыекъопэ къэлэ администрацием гъэсэныгъэмкIэ икомитет пIуныгъэмкIэ ыкIи ныбжьыкIэ политикэмкIэ иотдел ипащэу Пхэнэе Саидэ къызэриIуагъэмкIэ, бэдзэогъум и 4-м къыщегъэжьагъэу и 30-м нэс площадкэхэм Iоф ашIэщт. Тхьамафэм мэфитфырэ кIэлэцIыкIухэр ащ къякIолIэщтых, шэмбэтымрэ тхьаумафэмрэ зыгъэпсэфыгъо мафэх. ЧIыпIэ пэпчъ колледжым истудент нэбгырэ тIурытIу Iоф ащашIэ. ШIоигъоныгъэ зиIэ кIэ­лэцIыкIухэр зэкIэ площадкэхэм къякIуалIэх. Ахэм яуахътэ гъэшIэгъонэу, шIуагъэ къытэу зэ­рэ­зэхащэщтым студентхэр пы­лъых. Жьы къабзэм хэтхэу спор­тым ылъэныкъокIэ джэгукIэ зэфэшъхьафхэр афызэхащэх, ащ нэмыкIэу яшIэныгъэхэм ахагъэхъоным фэшI Iофтхьа­бзэхэр афызэхащэх, зэнэкъо­къухэм ахэлажьэх. Агъэфедэрэ Iэмэ-псымэхэр, джэгуалъэхэр пэшIорыгъэшъэу пIуныгъэмкIэ ыкIи ныбжьыкIэ политикэмкIэ отделым зэригъэгъотыгъэх.

Мы мафэхэм урамэу Ди­митровым ыцIэ зыхьырэм ща­гъэ­псыгъэ площадкэм тыщыIагъ. Ащ Iоф щызышIэрэ вожатэхэм гущыIэгъу тафэхъугъ, сабыйхэм языгъэпсэфыгъо уахътэ зэрагъакIорэм зыщыдгъэгъозагъ. Сабыйхэр зэрэ­чэ­фыхэрэм гухахъо зэрэхагъуа­тэрэр къыта­Iуагъ.

Мыщ къакIорэ кIэлэцIыкIухэм яуахътэ гъэшIэгъонэу зэ­-ра­гъакIорэр зэдырагъаштэу къаIо. Ахэр футбол, волейбол ешIэх. Тыгъэр къызыдэкIуаекIэ, жьаум чIэсхэу хырыхыхьэхэр къашIэх, шашкэ ешIэх, нэмыкI джэгукIэ гъэшIэгъонхэри къаугупшысых.

Сурэтыр Iэшъынэ Аслъан тырихыгъ.