Top.Mail.Ru

Хьисап еджапIэр къызэIуахыгъ

Image description

Адыгэ къэралыгъо университетым ибазэу «Горная легенда» зыфи­Iо­рэм гъэмэфэ хьисап еджапIэр бэдзэогъум и 5-м мэфэкI шIыкIэм те­тэу къыщызэIуахыгъ.

1995-рэ илъэсым къыщегъэ­жьагъэу ар Адыгеим щызэхащэ. Мыгъэ ащ я 28-у Iоф ышIэщт. НыбжьыкIэхэм программэ гъэшIэгъон афызэхагъэуцуагъ. Хьи­сапымкIэ егъэджэнхэр, хэу­шъхьафыкIыгъэ курсхэр ыкIи джэгукIэ зэфэшъхьафхэр афызэхащэщтых.

«Сэнаущыгъэ зыхэлъ кIэлэцIыкIухэр» зыфиIорэ республикэ программэм къыдыхэлъытагъэу гъэмэфэ хьисап еджапIэм ипроект Адыгеим щызэхащэ. АР-м гъэсэныгъэмрэ шIэныгъэмрэкIэ и Министерствэ, Адыгэ къэ­ралыгъо университетыр ыкIи рес­публикэ естественнэ-хьисап еджа­пIэр арых Iофтхьабзэм кIэщакIо фэхъугъэхэр.

Мы илъэсым «Горная легенда» зыфиIорэм Урысыем ишъо­лъыр 14-мэ къарыкIыгъэ кIэлэ­еджэкIуи 117-рэ къекIолIагъэх. Ахэр Адыгеим, Краснодар ыкIи Ставрополь крайхэм, Ямало-­Ненецкэ автономнэ шъолъырым, Астраханскэ, Ростовскэ, Волгоградскэ, Ярославскэ хэку­хэм, Москва, Къалмыкъым, Къэ­рэщэе-Щэрджэс Респуб­ли­кэм, Темыр Осетием ыкIи Лат­вием ащыщых.

Адыгэ къэралыгъо университетым, республикэ естественнэ-хьисап еджапIэм ыкIи нэ-мыкI гъэсэныгъэм иучреждениеу Адыгеим итхэм якIэлэ­егъаджэхэр, Урысыем ишъолъыр зэфэшъхьафхэм яспециалист цIэрыIохэр, урысые ыкIи дунэе хьисап зэнэкъокъухэм текIоныгъэ къащыдэзыхыгъэхэр арых ныбжьыкIэхэм ахэтыщтхэр.

Гъэмэфэ еджапIэм тхьамэфищым къыкIоцI Iоф ышIэщт, апэрэ тхьамэфитIум рейтинг системэм къыдыхэлъытагъэу кIэлэеджакIохэм егъэджэнхэр, аужырэ тхьамафэм хэушъхьафыкIыгъэ курсхэр афызэхащэщтых.

КIэлэеджакIохэм аныбжь ыкIи шIэныгъэу аIэкIэлъым елъытыгъэу куп-купэу агощыгъэх: езы­гъэжьэгъакIэхэр, нахьыкIэхэр, гурытхэр, нахьыжъхэр ыкIи олим­пиадэ купхэр.

КIэлэеджакIохэр хьисап зэ­нэкъокъу зэфэшъхьафхэм ыкIи олимпиадэхэм ахэлажьэх. Ащ ишIуагъэкIэ шIэныгъэхэр зэ­рагъэгъоты, купым хэтэу Iоф ашIэшъуным фещэх. ХэушъхьафыкIыгъэ курсхэм ауж кIэлэ­еджакIохэм заушэтыжьы, дэ­гъоу зыкъэзыгъэлъэгъуагъэхэм сертификатхэр е щытхъу тхылъхэр аратых.

Егъэджэнхэм анэмыкIэу ныбжьыкIэхэм Iофтхьэбзэ зэфэ­шъхьафхэр афызэхащэщтых. ФутболымкIэ, шахматымкIэ, теннисымкIэ зэнэкъокъухэм, арт-фестивалым, спектаклэу «Детектив-шоу», Квест-зэнэ­къокъоу «Математическая легенда», мастер-классхэм ахэлэжьэнхэ амал яIэщт.