Мы илъэсым урамэу Пионерскэр (Краснооктябрьскэм къыщегъэжьагъэу Го­го­лым ыцIэ зыхьырэм нэс) агъэкIэжьыщт ыкIи къалэм игупчэ автомобиль уцу­пIэхэр щагъэпсыщтых.

Лъэпкъ проектэу «Щынэгъончъэ ыкIи шэпхъэшIу­хэм адиштэрэ гъогухэр» зыфиIорэм къыдыхэлъы­тагъэу сомэ миллион 15 фэдиз ащ пэIуагъэхьанэу агъэнафэ.

Мыекъопэ къэлэ ад­ми­нистрацием ипресс-къу­лыкъу къызэритырэмкIэ, урамэу Пионерскэм, Краснооктябрьскэм къыщегъэ­жьагъэу Гоголым ыцIэ зыхьырэм нэс, гъэцэкIэ­жьын зэфэшъхьафхэр ащэ­кIох. Джащ фэдэу гъогу напцэхэр агъэтэрэзыщтых ыкIи тамыгъэхэм ягъэуцун ыуж ихьащтых.

Урамэу Пионерскэр, Краснооктябрьскэм къыщегъэжьагъэу Жуковскэм ыцIэ зыхьырэм нэс, агъэцэкIэжьы зыхъукIэ автомобильхэр зыдагъэуцун алъэкIыщт чIыпIэхэм ягъэпсын анаIэ нахь зэрэтырадзэщтыр ГИБДД-м иотделэу Мыекъуапэ щыIэм къыщаIуагъ. Шапхъэхэм къызэрэдалъытэрэмкIэ, зы автомобилыр зыдэуцущтым анахь макIэу метритф ыубытынэу щыт.

— Мы чIыпIэм транспортыбэ зэрэщызекIорэм ыкIи автомобильхэр зыдагъэуцущтыр зэрэщымыIэм къыхэкIыкIэ гъогу хъугъэ-­шIагъэхэр бэу зэ­рэщыхъу­хэрэр къыдэп­лъытэн фае. Автомобиль уцупIэхэм за­хагъахъокIэ, гъогур нахь нэкIы къэ­хъущт, щынэгъон­чъэным ылъэныкъокIэ шап­хъэхэм адиштэ хъущт, — еIо ГИБДД-м икъэлэ отдел ипащэу Александр Выходцевым.

Лениным ыцIэ зыхьырэ площадым дэжь чъыгхэр бэу щытых. УплъэкIунэу ашIыгъэхэм къызэрагъэ­лъагъорэмкIэ, ахэм жъэу, ипхыкIын фаеу ахэтыр бэ. Ащ ыуж автомобильхэр зыщагъэуцущт чIыпIэхэм фэдитIукIэ ахагъэхъон амал яIэ хъущт.

Мыекъуапэ щыпсэурэ цIыфхэм урамэу Пио­нерскэр, Краснооктябрьскэм къыщегъэжьагъэу Жуковскэм ыцIэ зыхьырэм нэс, агъэцэкIэжьынымкIэ яшIошIхэр къы­раIотыкIын алъэ­кIыщт. Мыекъопэ къэлэ администрацием ителеграм-каналэу «t.me/maikop­­_adm» зыфиIорэм къэлэ­дэсхэм амакъэ щатын алъэкIыщт.