ФедерациемкIэ Советым бюджетымкIэ ыкIи финанс бэдзэршIыпIэмкIэ и Комитет изэхэсыгъоу щыIагъэм Адыгеим ищысэкIэ, Урысые Федерацием ишъолъырхэм ябюджетхэр гъэпсыгъэхэ зэрэхъурэм щытегущыIагъэх.

Шъугу къэдгъэкIыжьын, мы аужырэ илъэситфым Адыгеим изэхэубытэгъэ бюджет ихахъо­хэр фэди 2,1-кIэ, республикэ бюджетым ихахъохэр фэди 1,5-кIэ нахьыбэ хъугъэх. Федеральнэ гупчэм къикIырэ IэпыIэгъур процент 15-м нэсэу къырагъэ­Iыхыгъ. Республикэм чIыфэу телъыр макIэ, къэралыгъо чIы­фэр процент 22-кIэ нахь макIэ хъугъэ ыкIи непэрэ мафэм ехъулIэу ар процент 21-м нэсыгъ. Бюджетым игъэпсын зэIухыгъэу зэрэщытымкIэ рес­публикэм я 3-рэ чIыпIэр къэралыгъом щиIыгъ. Шъолъыр фи­нансхэм ягъэзекIонкIэ пэ­рытныгъэ зыIыгъ субъектхэм ахахьэ, федеральнэ гупчэм къы­гъэуцурэ пшъэрылъхэр анахь дэгъоу зыгъэцакIэхэрэм ащыщ.

АР-м финансхэмкIэ иминистрэу Виктор Орловым къызэриIуагъэмкIэ, шъолъыр бюджетхэм хъарджхэм алъэныкъокIэ пшъэрылъэу апашъхьэ щытхэм ренэу зэрахахъорэм къыхэкIэу мы лъэныкъомкIэ республикэм иполномочиехэр ыгъэцэкIэнхэмкIэ къиныгъохэм яуалIэ. Ахэр дэгъэзыжьыгъэнхэм фэшI федеральнэ бюджетым къыхэгъэ­кIыгъэ ахъщэ тедзэ ящыкIагъ.

«Джырэ уахътэм диштэрэ инфраструктурэ гъэпсыгъэныр: Адыгэ Республикэм хэхъоныгъэ ышIыным ылъапс» зыфиIорэм щытегущыIагъэх ФедерациемкIэ Советым экономикэ полити­кэмкIэ и Комитет изэхэсыгъо. Фе­де­ральнэ гупчэм къытырэ амал­хэр къызфигъэфедэзэ рес­публикэр ыпэкIэ лъэкIуатэ. Ахэм зэу ащыщ Адыгеим социальнэ-экономикэ хэхъоныгъэ ышIыным фытегъэпсыхьэгъэ унэе программэу 2020 — 2024-рэ илъэс­хэм ателъытагъэр. Мы Iо­фыгъом епхыгъэу къэгущы­Iагъ АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур.

Джащ фэдэу шъолъырым иагропромышленнэ комплекс хэхъоныгъэ ышIынымкIэ пшъэ­рылъхэр зэрэзэшIуахырэм, тапэкIэ анахьэу анаIэ зытырагъэ­тыщтхэм къатегущыIагъ Адыгеим мэкъу-мэщымкIэ иминистрэу Къуанэ Анзаур.