Сэнаущыгъэ ин зыхэлъ ныбжьыкIэхэм IэпыIэгъу афэхъугъэнымкIэ гъэсэныгъэ инфраструктурэ дэгъу Адыгеим иI.

АР-м и ЛIышъхьэ гъэсэны­гъэм исистемэ хэхъоныгъэ егъэ­­шIыгъэным, анахь кIэлэ­еджэкIо дэгъухэр къыхэгъэщы­гъэнхэм ыкIи IэпыIэгъу ятыгъэ­ным атегъэпсыхьэгъэ IофшIэным мэхьанэшхо зэриIэр къыхегъэщы. Инновационнэ проектхэр щыIэныгъэм пхырыщыгъэнхэмкIэ ишIуагъэ аригъэкIыным зэрэфэхьазырыр КъумпIыл Мурат къеIо.

— Мы лъэныкъомкIэ Iоф­шIэнышхо зэшIотэхы. Ректорэу Мамый Даутэ кIэщакIо зыфэ­хъурэ Iофтхьабзэхэм сыдигъокIи адетэгъаштэ, ащ ишIуа­гъэкIэ хьисап гупчэшхо Адыге­им къыщызэIутхыгъэу Iоф ешIэ. Урысыем и Пре­зидентэу Владимир Путиным гъэсэныгъэм ылъэныкъокIэ къахилъхьагъэхэр щыIэныгъэм щыпхырыщыгъэнхэм пае бэ зэшIотхыгъэр. Непэ сэнаущыгъэ зыхэлъ кIэлэцIыкIухэр къыхэ­гъэщыгъэнхэмкIэ ыкIи IэпыIэгъу ахэм ятыгъэ­нымкIэ республикэ гупчэу «По­лярис-Адыгея», технопаркэу «Кванториум» зыфи­Iохэрэм Iоф ашIэ, джащ фэдэу цифровой технологиехэм атегъэпсыхьэгъэ Гупчэу «IТ-кубыр», гъэсэныгъэм тегъэпсыхьэгъэ гупчэхэу «Точка роста» зыфиIохэрэр тиIэх. А IофшIэныр джыри тапэкIи нахьышIоу зэ­хэщагъэ хъуным тынаIэ тедгъэ­тыщт, — къы­Iуагъ КъумпIыл Мурат.

Сэнаущыгъэ ин зыхэлъ кIэлэ­цIыкIухэм IэпыIэгъу ятыгъэ­ным фытегъэпсыхьэгъэ Iоф­шIэным ишIуагъэкIэ Адыгеим икIэлэ­еджа­кIохэр Урысыем ыкIи дунаим ащызэхащэрэ олимпиа­дэ­хэм, зэнэкъокъу зэфэшъхьафхэм текIоныгъэ къызэрэщыдахырэр АР-м и ЛIышъхьэ къыхигъэ­щыгъ. ГущыIэм пае, ВсОШ-м икIэух чэзыу нафэ къызэ­рэщы­хъугъэмкIэ, республикэм икIэлэ­еджэкIуищ текIоныгъэр къыда­хыгъ, ахэм ащыщэу тIур рес­публикэ естественнэ-хьисап еджапIэм щеджэх. КIэлэ­еджа­кIохэм я Урысые олим­пиадэ икIэух къызэригъэлъагъорэмкIэ, 2022-рэ илъэсым респуб­ликэм икIэлэеджакIохэм Урысыем я 24-рэ чIыпIэр щаубытыгъ, хэгъэ­гум и Къыблэ хэ­хьэ­рэ шъо­лъыр­хэмкIэ апэрэ чIы- пIэр аIыгъ.

Сэнаущыгъэ зыхэлъ кIэлэцIыкIухэм Iоф адэшIэгъэнымкIэ Адыгеим опытэу IэкIэлъымкIэ нэмыкI шъо­лъырхэм адэгуащэ. ГущыIэм пае, Адыгэ къэралы- гъо университетым наукэмкIэ ыкIи инновациехэмкIэ и Парк фе­деральнэ, шъолъыр научнэ-шIэныгъэ проект заулэхэм ягупчэ хъугъэ. Урысые Федерацием ивице-премьерэу Дмит­рий Чернышенкэр бэмышIэу Адыгеим къызэкIом къызэрэхигъэщыгъагъэмкIэ, ИТ-кадрэхэм якъэгъэ­хьазырынкIэ Адыгэ къэ­ралыгъо уни­верси­тетым хьисапымкIэ и Гупчэ ама­лышхохэр иIэх.

Адыгэ къэралыгъо универ­си­тетымрэ экономикэмкIэ Ап­шъэ­рэ еджапIэмрэ зэгъусэхэу про­ект заулэ зэдагъэцакIэ.

Та­­пэкIи а зэдэлэжьэныгъэр лъагъэкIотэн мурад яI. Шъугу къэд­гъэкIыжьын Адыгэ къэралыгъо университетымрэ эко­номикэмкIэ Апшъэрэ еджапIэмрэ бэмышIэу зэдэлэжьэнхэмкIэ зэзэгъыныгъэм зэрэкIэ­тха­­гъэхэр.