УФ-м и Роспотребнадзор къызэритырэмкIэ, коронавирусыр къызэузыгъакIэу къыхагъэщыхэрэм япчъагъэ мы уахътэм зэхапшIэу къеIыхыгъ. Тызхэт илъэсым имэзэе мазэ узыр къызэутэкIыгъэу атхыщтыгъэм елъытыгъэмэ, мы уахътэр фэдэ 64-кIэ нахь макIэ хъугъэ.

Коронавирусыр зиIэу агъэунэфыхэрэми япроцент 93-м узыр къямыхьылъэкIэу апэкIэкIы.

Эпидемиологическэ Iофым изытет джащ фэдэ зыпкъ­итыныгъэ зэрэхэлъым къыхэкIыкIэ, узыр зэпамыхынымкIэ щыIэгъэ гъунапкъэхэр джы тырахыжьыгъэх. Роспотребнадзорым иунашъокIэ, бэдзэогъум и 1-м къыщегъэжьагъэу шхапIэхэр зэкIэ зытетыгъэ режимым техьажьынхэ алъэкIыщт, нэгуихъор, нэмыкIхэри агъэфедэжьыщтхэп.

Джащ фэдэу ведомствэм къызэритыгъэмкIэ, COVID-19-м епхыгъэу эпидемиологием изытет къызызэIахьэкIэ гъунапкъэхэм къарагъэгъэзэжьыщт.

Темыр-КъохьэпIэ къэралыгъо медицинэ университетым икафедрэ ипащэу Роман Деевым гъэзетэу «Известия» зыфиIорэм дыриIэгъэ зэдэгущыIэгъум къызэрэщиIуагъэмкIэ, зэрэдунаеу коронавирусыр нахь макIэ ащыхъугъ. COVID-19-р къызэузыхэрэм япчъагъэ зэреIыхыгъэр ушъхьагъубэмэ япхыгъ. Университетым къызэрэщалъытагъэмкIэ, нэбгырэ миллион 555-м ехъу дунаим щысымэджагъ, миллиони 6-м ехъумэ ядунай ахъожьыгъ, вакцинэ зэфэшъхьафэу миллиард 12 фэдиз къагъэхьазырыгъ.

Коронавирусыр зэрэзэкIэкIуагъэм емылъытыгъэу УФ-м вакцинацием епхыгъэ Iоф­тхьабзэр джыри щылъа­гъэкIуатэ. Ащ ыпкIэ хэлъэп ыкIи тикъэралыгъо коронавирусым пэуцужьырэ вакцини 7 щатхыгъ. Ахэр: «Спутник V», «Спутник Лайт», «Спутник М», «ЭпиВакКорона», «ЭпиВакКорона-Н», «КовиВак» ыкIи «Конвасэл» зыфиIохэрэр.