Адыгэ Республикэмрэ Краснодар краимрэ арыс быслъы­мэнхэм я ДиндэлэжьапIэ къызэритыгъэмкIэ, 2022-рэ илъэсым бэдзэогъум и 9-р — Къурмэн мэфэкI. Пчэдыжьым сыхьатыр 8-м мэфэкI нэмазыр аублэщт.

Адыгеим и ЛIышъхьэ 2021-рэ илъэсым чъэпыогъум и 14-м ышIыгъэ унашъоу N 144-м къыдыхэлъытагъэу Къурмэныр мэфэкI мафэу агъэнэфагъ. УФ-м IофшIэнымкIэ и Кодекс зэритымкIэ, мэфэкI мафэр зыгъэпсэфыгъо мафэм зытефэкIэ а мафэр лъагъэкIуатэ ыкIи къыкIэлъыкIорэ IофшIэгъу мафэр зыгъэпсэфыгъо ашIы. Ащ къыхэкIэу бэдзэогъум и 11-р зыгъэпсэфыгъо маф.

Быслъымэн мэфэкIышхуитIум язырэр Къурмэныр ары — хьаджэшIыным икIэух, къурмэн шIыгъэным имэфэкI. Бирамым ыуж мэфэ 70-рэ зытешIэкIэ ар хагъэунэфыкIы.