УФ-м и Президент иунашъокIэ «социальнэ зэзэгъыныгъэм» къыдэлъы­тэгъэ ахъщэ анахьыбэу къатырэм къыхэхъуагъ.

Бэдзэогъу мазэм и 1-м ­къыщыублагъэу ащ фэдэ зэ­зэгъыныгъэ зышIыхэрэм бизнес рагъэжьэным пае сомэ мин 350-м, унэгъо хъызмэт зыгъэпсымэ зышIоигъохэм сомэ мин 200-м нэсэу къаратыщт.

АР-м IофшIэнымкIэ ыкIи ­социальнэ хэхъоныгъэмкIэ и Министерствэ къызэрэщаIуа­гъэмкIэ, унагъоу чIыпIэ къин ифагъэмрэ цIыфхэр социальнэу къэухъумэгъэнхэм фэгъэзэгъэ къулыкъухэмрэ зэдашIырэ зэзэгъыныгъэу ар щыт. Ащ ишIуагъэкIэ IофшIэпIэ чIыпIэ зымыгъотырэр нэмыкI сэнэхьат феджэжьын ылъэкIыщт, унэе бизнес къызэIуихын, кIэлэцIыкIухэм апае щыгъын е нэмыкIэу еджапIэм щырищыкIэгъэщтыр къырищэфын ылъэкIыщт.

«Социальнэ зэзэгъыныгъэм» къыдэлъытэгъэ къэралыгъо IэпыIэгъур Адыгеим зыщатырэр 2014-рэ илъэсым къыщегъэ­жьагъ. 2020-м нэс пштэмэ, ащ фэдэ IэпыIэгъу къызIэкIэхьа-гъэр унэгъо 269-рэ мэхъу.

2021-рэ илъэсым, федеральнэ ахъщэу ащ пае къатIупщыгъэри хэтэу, IэпыIэгъум сомэ миллион 86,6-рэ республикэм пэIуигъэхьагъ. ПстэумкIи нэ­бгырэ 2800-рэ ащ къызэлъиубытыгъ, зэзэгъыныгъэу ашIы­гъэр 714-рэ мэхъу.

2022-рэ илъэсыр пштэмэ, мы IэпыIэгъум пае сомэ миллион 89,8-рэ агъэнэфагъ. Илъэсым иапэрэ мэзитф хэлэжьагъэр унэгъо 405-рэ мэхъу, сомэ мил­лион 40,3-рэ ахэм аратыгъ.