Къоджэ псэупIэхэм хэхъоныгъэ ягъэшIыгъэным фыте­гъэ­псыхьэгъэ программэм къыдыхэлъытагъэу республикэм щызэшIуахыщтхэм пстэумкIи сомэ миллиардрэ миллион 573,6-рэ апэIухьащт.

Ащ щыщэу сомэ миллиардрэ миллион 494,8-р федеральнэ ахъщ, сомэ миллион 36-р республикэ бюджетым къыхэхыгъ.

Адыгеим имуниципальнэ образованиехэм ащыщэу программэм мыгъэ хэлажьэхэрэр Кощхьэблэ, Красногвардейскэ, Мыекъопэ ыкIи Теуцожь районхэр ары. АР-м и ЛIышъхьэ ипресс-къу­лыкъу къызэритыгъэмкIэ, программэм къыдыхэлъытагъэу культурэм и Уни 3, врачхэр ачIэсынхэу амбулатории 2, ФАП-у 3, физкультурэм щыпылъынхэу ыкIи япсауныгъэ щызэтырагъэуцожьынэу комплекси 5, псэушъхьэхэм ащяIэзэнхэу участки 3, кIэлэцIыкIу IыгъыпIэу 3 кIэу ахэм ащагъэуцу, гъэ­стыныпхъэ шхъуантIэм икIуапIэу километри 5,5-рэ, псым икIуапIэу кило­метрэ 76,7-рэ ащагъэпсы, культурэм и Уни 5 ыкIи зы еджапIэ агъэкIэжьы.

ПIалъэхэм атемыфэу, игъом амы­тыгъэ псэуалъэхэм апае АР-м и ЛIы­шъхьэу КъумпIыл Мурат унэшъо гъэ­нэфагъэхэр ышIыгъэх, чIыпIэхэм япащэхэу тхылъхэм ягъэхьазырын зыгъэгужъуагъэхэм, бюджет ахъщэр зэрищыкIагъэм тетэу зымыгъэфедагъэхэм яIофшIакIэ зэримыгъэразэрэр пхъашэу къыриIотыкIыгъ.