Адыгеим ичIыгулэжьхэм мыгъэ Iуахыжьынэу пстэумкIи бжыхьэсэ гектар 105844-рэ апхъыгъагъ. Ащ щыщэу 12144-р хьэм рагъэубытыгъ, коцыр гектар 93374-рэ мэхъу.

Джащ фэдэу рапс гектар 9538-рэ, тритикалеу 155-рэ халъхьэгъагъ.

АР-м мэкъу-мэщымкIэ и Министерствэ бэдзэогъум и 5-м тызэрэщигъэгъозагъэмкIэ, хьэм иIожьын гъунэм рафылIагъ. Гектар 10953-у апхъыгъагъэм 9755-р хагъэкIыгъ. Зы гектарым, гурытымкIэ лъытагъэу, центнер 50,9-рэ къырахыжьы.

АщкIэ апэ итых Джэджэ районым ичIыгулэжьхэр. ПстэумкIи бжыхьэсэ хьэ гектар 2793-рэ халъхьэгъагъ, 2630-м ехъу Iуа­хыжьыгъах. ГурытымкIэ лъы­тагъэу, зы гектарым центнер 55,6-рэ къеты, тонн 14647-рэ къаугъоижьыгъ.

Красногвардейскэ районым ичIыгулэжьхэр ахэм ауж кIэкIэу итых. ГурытымкIэ лъытагъэу, гектарым центнер 55,9-­рэ къырахы.

Адыгеим ичIыгулэжьхэм, зэкI пIоми хъунэу, коцым иIожьыни рагъэжьагъ, гектар 5435-р ары Iуахыжьыгъэр. ГурытымкIэ лъы­тагъэу, центнер 52,8-рэ зы гек­тарым къеты.

Джэджэ районыр мыщкIи апэ ит. Гектар 22736-у ащ ичIыгу­лэжьхэм халъхьэгъагъэм 1447-рэ хагъэкIыгъ, центнер 57,8-рэ, гурытымкIэ лъытагъэу, къырахы.

Мыекъуапэрэ Адыгэкъалэрэ ячIыгулэжьхэр ом егъэохъух, коцым джыри фежьагъэхэп.

Рапс гектар 10491-рэ пстэ­умкIи республикэм щыхалъхьэгъагъ. Ари мы мафэхэм Iуа­хыжьы. ГурытымкIэ лъытагъэу, ащ центнер 25,8-рэ къекIы.