ЗекIоныр
Билет уасэхэр къаратыжьыщтых
УФ-м транспортымкIэ и Министерствэ къызэриIуагъэмкIэ, Урысыем иавиакомпаниехэм билет ащызыщэфыгъэхэу, ау тихэгъэгу къытыралъхьэгъэ санкциехэм апкъ къикIыкIэ зыдежьэгъэхэ чIыпIэм мыбыбышъугъэхэм, ахэм алъатыгъэ уасэхэр къаратыжьыщтых.
Авиакомпание 20-мэ сомэ миллиард 17 фэдиз хабзэм къафитIупщыщт. Ахъщэр апэу къызэратыжьыщтхэр хэгъэгу кIоцIым къыщакIухьанэу мэзаем и 24-м къыщегъэжьагъэу бэдзэогъум нэс билетхэр къэзыщэфыгъэхэ зыгъэпсэфакIохэр ары. Мэзаем и 24-м щыублагъэу чъэпыогъум и 31-м нэс IэкIыб хэгъэгухэм кIонхэу фэягъэхэми билет уасэхэр къафызэкIагъэкIожьыщтых.
ЗэрэхъурэмкIэ, цIыфхэм ащэфыгъэ билет миллион фэдизым атефагъэр хабзэм къафыригъэгъэзэжьыщт.
Шъачэ – Тыркуер
ЗыгъэпсэфакIохэр зажэщтыгъэхэ хы круизэу «Шъачэ – Тыркуер» зыфиIорэр гъэтхапэм гъогу техьанэу щытыгъ, ау къадэхъугъэп. Джы лайнерэу Астория Грандыр бэдзэогъум и 15-м пчыхьэм сыхьатыр 10-м Шъачэ икъухьэуцупIэ апэрэу щыIукIыщт.
Круизым хэлэжьэщтхэм Тыркуем икъалэхэу Стамбул, Чешме, Синоп ыкIи Трабзон арагъэлъэгъущтых. Лайнерыр тхьамафэ къэс зэ, шэмбэт мафэм, IукIызэ ышIыщт, зыгъэпсэфакIохэр мэфи 8 гъогум тетыщтых.
Тыркуем къухьэкIэ кIо зышIоигъохэм бэдзэогъум къыщегъэжьагъэу чъэпыогъум нэс зыфэе мафэхэр къыхахынхэ амал яI.
Лайнерыр нэбгырэ 1328-рэ зэрищэным фытегъэпсыхьагъ, ресторанхэр, зыгъэпсэфыпIэхэр, театрэ хэтых. Къухьэм Iоф щызышIэхэрэм зэкIэми урысыбзэр ашIэн фае. Тырку къалэхэр къязыгъэплъыхьащт гидхэри урысыбзэкIэ къадэгущыIэщтых.
ЧIэнагъэ хъущтэп
Урысые Федерациер Дунэе зекIон организацием (ЮНВТО-м) къыхэкIыжьыным Правительствэм дыригъэштагъ, а IофыгъомкIэ унашъоу ашIыгъэм УФ-м и Премьер- министрэу Михаил Мишустиныр кIэтхэжьыгъ.
Илъэс зэфэшъхьафхэм мы организацием хэгъэгу пчъагъэ хэкIыжьыгъ. ГущыIэм пае, я 90-рэ илъэсхэм США-мрэ Австралиемрэ ар къабгынэгъагъ. Нэужым Сингапур, Великобританиер, Канадэр, нэмыкIхэри хэкIыжьыгъэх.
Дунэе зекIон организацием Урысыер къызэрэхэкIыжьыгъэр хэгъэгу кIоцI зекIоным пэрыохъу зэрэфэмыхъущтыр Ростуризмэм ипащэу Зарина Догузовам къыIуагъ. Дунэе организацием тыхэмытыми, IэкIыб къэралыгъохэм зэпхыныгъэу адытиIэр зэрэзэпымыущтым къыкIигъэтхъыгъ.
КурортыкIэхэр тищыкIагъэх
БэмышIэу Санкт-Петербург щыкIогъэ Дунэе экономическэ форумым Ростуризмэм ипащэу Зарина Догузовам зэрэунагъоу зызщагъэпсэфын алъэкIыщт хы курортхэм ягъэпсын игъо зэрэхъугъэм игугъу къыщишIыгъ.
— Уахътэм диштэрэ зыгъэпсэфыпIэхэр тищыкIэгъэ шъыпкъэх. Унагъом исхэр зэкIэ зэгъусэхэу яуахътэ щагъакIомэ ашIоигъощт. Ащ фэдэ курортхэр гупсэфыщтых, цIыфхэми агу рихьыщтых, — къыIуагъ З. Догузовам.
Ащ фэдэ зыгъэпсэфыпIэхэм ягъэпсын илъэси 10 фэдиз ыхьыщт, къызщызэIуахыщтхэр Урысыем икъыблэрэ Каспийскэ хымрэ адэжь.
Къэралыгъо Думэм идепутатэу Сангаджи Тарбаевым форумым къыщиIэтыгъэ Iофыгъори гъэшIэгъоны. Ащ Урысые Федерациер зипэщэ Дунэе зекIо организацие агъэпсымэ инэу ишIуагъэ къэкIощтэу ылъытагъ.
ЮАР-м игъунапкъэхэр къызэIуихыжьыгъ
ЮАР-м IэкIыб хэгъэгухэм къарыкIырэ зыгъэпсэфакIохэм зэкIэм икъэралыгъо гъунапкъэхэр къафызэIуихыжьыгъ, Урысыем икIыхэрэри ахэм ащыщых.
Африканскэ республикэм кIохэрэм ПЦР-тестри, нэмыкI медицинэ тхылъхэри арамыгъэлъэгъухэми хъунэу Правительствэм унашъо ышIыгъ. БгъэцэкIэн фэе закъор республикэм узэрихьагъэр къэзыушыхьатырэ анкетэр зэрэптхыщтыр ары.
ЮАР-м псауныгъэм икъэухъумэнкIэ иминистрэ къызэриIуагъэмкIэ, Урысыем къикIырэ зыгъэпсэфакIохэр апэ Стамбул ыкIи Дубай къухьэлъатэкIэ нэсынхэ фае.
УхэхьанкIэ щынагъоп
Роспотребнадзорым къызэритырэмкIэ, зыгъэпсэфыгъо уахътэр Шъачэ къызыщызэIуахыгъэм къыщегъэжьагъэу хыпсым изытет зыфэдэр зэрагъэшIэнэу уплъэкIун миным ехъу ашIыгъ.
— Тэ типшъэрылъыр хьакIэу къакIохэрэм гупсэфэу ыкIи щынэгъончъэу загъэпсэфыныр ары, — къыIуагъ Шъачэ имэрэу Алексей Копайгородскэм. — КъакIорэ пэпчъ гукъэкIыжь дэгъухэр зыдихьыжьынхэу, къыкIэлъыкIорэ илъэсми курортым къыгъэзэжьынэу тыфай.
ЦIыфхэм рэхьатэу загъэпсэфыным фэшI краим ирайон зэфэшъхьафхэм яхэбзэухъумакIохэм ащыщхэр къырагъэблагъэх. Мы лъэхъаным къалэм нэбгырэ минишъэм ехъумэ зыщагъэпсэфы, ау хьакIэщхэм джыри чIыпIэ нэкIыхэр яIэх.