УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу Адыгеим икъэлэ шъхьаIэ иурамэу Пушкиным ыцIэ зыхьырэм игъогухэр мы уахътэм агъэкIэжьых.

КъэкIощт 2023-рэ илъэсым мы лъэпкъ проектым къыдыхэлъытагъэу агъэцэкIэжьын фэя­гъэхэм ар ащыщ. ПIалъэм ыпэ итхэу гъогу псэуалъэхэр зэрагъэкIэжьыхэрэм фэшI, чэзыур нахьыжьэу нэсыгъ. Ащ ыпэкIэ къэлэ псэупIэ коим хахьэрэ къутырэу Гавердовскэм иурамэу Молодежнэмрэ поселкэу Родниковэм иурамэу Советскэмрэ ягъогухэр агъэцэкIэжьыгъэх.

Пушкиным ыцIэ зыхьырэ урамыр километри 4 фэдиз мэхъу, Старобазарнэм къы­щегъэжьагъэу Железнодорожнэм нэсы. БлэкIыгъэ мэкъуогъу мазэм IофшIэнхэр щырагъэжьагъэх. Мы уахътэм бордюрхэр зэблахъух, лъэсрыкIо гъогоу жъы хъугъэр тырахы, плиткэхэр хагъэпкIэнхэм фагъэхьазыры. Ар зэрагъэкIэжьыщтым дакIоу газонхэри зэтырагъэпсыхьа­жьыщтых. Ахэм ауж автомобиль гъогур агъэцэкIэжьыщт, транспорт уцупIэхэр зыщищыкIагъэм фашIыщтых, тамыгъэхэр кIэу агъэуцущтых.

Мыекъопэ къэлэ админист­рацием къызэрэщаIуагъэмкIэ, проектым къыдэлъытэгъэ фе­де­ральнэ ахъщэр, ар сомэ миллиони 112-рэ, автомобиль гъогум игъэцэкIэжьын пэIуагъэ­хьащт. ЛъэсрыкIо гъогухэмрэ газонхэмрэ шъолъыр ахъщэкIэ агъэкIэжьыщтых. ИлъэсыкIэ еджэгъур рамыгъажьэзэ Пушкиным ыцIэ зыхьырэ урамым IофшIэнхэр щаухынхэу ары зэрагъэнэфагъэр.

Лъэпкъ проектым къыдыхэлъытагъэу мы илъэсым гъогу Iахьи 9, ар километри 10-м ехъу, Мыекъуапэ щагъэцэкIэ­жьыщт. Гъогум изытети, социальнэ мэхьанэу иIэри, цIыфхэм яшIоигъоныгъэхэри къыдалъы­тэхэзэ ыпэрапшIэу агъэкIэжьыщтыр къыхахы. Транспортыр жъугъэу зыщызекIорэр, социаль­нэ псэуалъэхэм апэблагъэ­хэр ыпэ ашIых.

Мары мы мафэхэм Пушкиным ыцIэ зыхьырэм имызакъоу, урамхэу Пионерскэм, Советскэм ыкIи Гоголым гъогухэр ащагъэцэкIэжьынхэу ра­гъэ­жьагъ. ТапэкIэ урамхэу Пионерскэр, 2-м, Госпитальнэм Iоф­шIэнхэр ащырагъэжьэнхэу гухэлъ яI.

ХЪУТ Нэфсэт. Сурэтыр Iэшъынэ Аслъан ты­­рихыгъ.