Хэбзэихъухьэхэм я Советэу АР-м и Къэралыгъо Совет – Хасэм щызэхащагъэм мы зэIугъэкIэгъумкIэ апэрэ зэхэсыгъо иIагъ.

АР-м ихэбзэ гъэцэкIэкIо къу­лыкъухэм, хэбзэухъумакIохэм, район ыкIи псэупIэ кой администрациехэм, федеральнэ ыкIи республикэ къулыкъу зэфэ­шъхьафхэм ялIыкIохэр ащ хэлэжьагъэх. Мы Советым ипащэу, АР-м и Парламент и Тхьаматэу Владимир Нарожнэм ар зэрищагъ.

Пстэумэ апэу ар АР-м и ЛIышъхьэ ыкIи депутатхэм ацIэ­кIэ зэхэсыгъом хэлажьэхэрэм шIуфэс къарихыгъ, шIуагъэ къытэу Советым иIофшIэн лъи­гъэкIотэнэу къафэлъэIуагъ.

ЦIыфхэм ярэхьатныгъэ, гъэсэныгъэм иучреждениехэм апэблагъэу шъон пытэхэр амыщэнхэм афэгъэхьыгъэ законхэр гъэцэкIагъэ зэрэхъухэрэр, кIэлэцIыкIухэм языгъэпсэфыгъо уахътэ изэхэщэн, почтэм иIоф­шIэн, рекламэхэр, мэкъэгъэ­Iухэр, нэмыкI вывескэ зэфэ­шъхьафхэр урысыбзэкIэ тхыгъэн­хэм фэгъэхьыгъэ джэпсалъэр ары анахьэу зытегущыIагъэхэр.

ЫпэрапшIэу Советым итхьаматэ игуадзэ хадзыгъ. Красногвардейскэ районым инароднэ депутатхэм я Совет ипащэу Анна Выставкинам зэкIэми зэдаштэу амакъэхэр фатыгъэх.

Шъон пытэхэр зырыз шIыкIэм тетэу IугъэкIыгъэнхэм фэгъэхьыгъэ республикэ хэбзэгъэуцугъэм ахэр зыныбжь имыкъугъэхэм аращэн фимытхэу къызщиIорэ гъэтэрэзыжьын шъолъыр Парламентым щаштагъ. Ау ащ пае къэмынэу, «энергетиккIэ» за­джэхэрэ шъонхэр зыныбжь имыкъугъэхэм, ары пакIошъ, кIэлэцIыкIухэм, языщэхэрэр щыIэх. Ащ фэшI республикэм ихэбзэихъухьэ къулыкъу ыштэгъэ законыр гъэцэкIагъэ зэрэ­хъу­рэм лъыплъэнэу комиссие зэхэщэгъэным, щапIэу ар зымы­гъэцакIэхэрэм административнэ пшъэдэкIыжьэу ахьырэр нахь гъэлъэшыгъэным Къэралыгъо Советым – Хасэм изэхэсыгъо щытегущыIэнхэу Iофтхьабзэм хэлажьэхэрэм зэдаштагъ.

ЦIыфхэм ярэхьатныгъэ, языгъэпсэфыгъо уахътэ зыукъохэрэми ягугъу ашIыгъ. Ащ фэгъэхьыгъэу зэхэсыгъом къыщыгущыIагъэх Адыгеим инахьыжъхэм я Совет ипащэу ГъукIэлI Нурбый, Мыекъуапэ имэрэу Геннадий Митрофановыр ыкIи Тэхъутэмыкъое районым инароднэ депутатхэм я Совет итхьаматэу Хьатитэ Алый.

Чэщырэ автомашинэхэм мэкъэшхо апыIукIызэ урамхэм арэчъэх, ресторанхэм, кафехэм ащыщыбэхэм Iоф зэрашIэщт охътэ гъэнэфагъэу яIэр аукъо, Мыекъуапэ изыгъэпсэфыпIэ чIыпIэу транспортыр рыкIон зэрэфимытыр къэзыушыхьатырэ тамыгъэр зытырагъэуцуагъэхэм автомобильхэр атиз зэпыт. Ахэр ары анахьэу къыхагъэщыгъэхэр, гъунэгъоу мэкъэшхо къэзыгъэ­Iухэрэм апае тхьаусыхэрэри мымакIэу зэрэщыIэхэр къаIуагъ.

Мы гумэкIыгъохэм хэбзэухъу­мэкIо къулыкъухэм анаIэ атырадзэнэу къялъэIугъэх.

Гъэмэфэ уахътэм кIэлэцIыкIухэм языгъэпсэфыгъо уахътэ республикэм зэрэщызэхащэрэми зэхэсыгъом щытегущыIагъэх. АР-м IофшIэнымкIэ ыкIи социальнэ хэхъоныгъэмкIэ иминистрэ игуадзэу Ирина Ширинам къызэриIуагъэмкIэ, 2022-рэ илъэсым кIэлэцIыкIухэм языгъэ­псэфыгъо уахътэ зэхэзыщэрэ организацие 94-мэ республикэм Iоф щашIэ. Ахэм ащыщэу лагерищыр Мыекъопэ кIыбым щыIэх, кIэлэцIыкIу мини 2,6-м ехъумэ защагъэпсэфыщт. Мафэрэ Iоф зышIэрэ лагерьхэм нэбгырэ минитфым ехъу ащыIэщт. Зыгъэ­псэфыгъо уахътэм изэхэщэн сомэ миллион 90,3-рэ республикэм пэIуигъэхьанэу ыгъэнэфагъ.

ИгъэкIотыгъэу зытегущыIагъэ­хэм ащыщ Федеральнэ почтэ зэпхыныгъэм и ГъэIорышIапIэу Адыгеим щыIэм иIофшIэн зэрэзэхищэрэр. Ащ ипащэу Наталья Алифиренкэм нахьыбэу зигугъу къышIыгъэр республикэм исхэм яфэIо-фашIэхэр икъу фэдизэу агъэцэкIэнхэмкIэ пэрыохъу къафэхъурэ щыкIагъэу щыIэхэр ары.

ГущыIэм пае, почтэм икъутамэхэр зычIэтыщт унэхэмкIэ гумэкIыгъохэр щыIэх. Район ыкIи псэупIэ кой администрациехэм япащэхэм закъыфигъа­зэзэ, амалэу щыIэмкIэ мыщ ядэгъэзыжьын анаIэ тырадзэнэу къялъэIугъ. Iоф зышIэрэ почтэм икъутамэхэм ащыщыбэхэм пащэхэр яIэхэп, почтальонхэр икъухэрэп. Ари гумэкIыгъо шъхьаIэхэм ащыщ. Джащ фэдэу къатыбэу зэтет унакIэу агъэуцугъэр затыкIэ, ащ иадрес, фэтэрхэм яномерхэр игъом почтэм IэкIагъа­хьэхэрэп. Ащ ыпкъ къикIыкIэ ахэм ащыпсэ­ухэрэм почтэмкIэ къафэкIуа­гъэр игъом араты­жьын алъэкIырэп.

Муниципальнэ образованиехэм, псэупIэ кой администрациехэм ялIыкIоу зэхэсыгъом хэлажьэхэрэми почтэм иIофшIэн щыкIагъэу халъагъохэрэр къыраIотыкIыгъ. Къыхагъэщыгъэр почтэм Iоф щызышIэхэрэм, анахьэу почтальонхэм, ялэжьапкIэ зэрэцIыкIум къыхэкIыкIэ а IофшIэным Iухьанэу къезэгъырэр зэрэмакIэр ары. Ащ имыза­къоу, почтальоным фэIо-фашIэ­хэр зыщигъэцэкIэщт чIыпIэу шапхъэхэм ащыгъэнэфагъэр, ар километри 10, зэрэбэдэдэр къаIуагъ. НыбжьыкIэхэр ары зыкIуачIэ къыхьыщтыр, ау ахэр а IофшIэным фаехэп, нахьыжъхэм ащ фэдиз гъогу акIуныр къин къащэхъу.

Iофыгъоу лъэныкъуитIум къа­Iэтыгъэхэм затегущыIэхэм ыуж, шъхьадж зыфэгъэзагъэмкIэ щыкIагъэхэм ядэгъэзыжьын нахьыбэу ынаIэ тыригъэтынэу зэгурыIуагъэх.

Къэралыгъо Совет – Хасэм мы тхьамафэм зэхэсыгъоу иIагъэм щаштэгъэ джэпсалъэми тегущыIагъэх. Урысые политическэ партиехэу «Единэ Россием», КПРФ-м, ЛДПР-м ыкIи «Новые люди» зыфиIорэм япащэхэм ар афэгъэзагъ. Рек­ламэхэр, мэкъэгъэIухэр, нэ­мыкI вывескэ зэфэшъхьафэу къыпа­лъэхэрэр урысыбзэкIэ тхы­гъэн­хэу, IэкIыб къэралыгъуабзэхэр амыгъэфедэнэу унашъо штэгъэ­ным ар фэгъэхьыгъ.

Адыгеим къэралыгъобзитIу, урысыбзэмрэ адыгабзэмрэ зэриIэр къыхагъэщызэ, ахэм ащыщ амыгъэфедэу, инджылызыбзэкIэ вывескэхэм япроцент 80-р зэрэтхыгъэр зэрэмытэрэзыр депутатхэм къыхагъэщыгъ. Советым хэтхэми ащ дырагъэштагъ.

ХЪУТ Нэфсэт.