ЦIыфхэр IофшIэным кIэгъэгушIугъэнхэр
2022-рэ илъэсым гъэтхапэм и 18-м УФ-м и Правительствэ ыштэгъэ унашъоу N 398-р зиIэм къызэрэщиIорэмкIэ, юридическэ ыкIи унэе предпринимательхэм къэралыгъо IэпыIэгъоу субсидиер аратын алъэкIыщт, гущыIэм пае, цIыфыр IофшIапIэм заштэкIэ.
Мы Iофыгъор зыфэгъэхьыгъэр цIыфхэр, анахьэу илъэс 30-м емыхъугъэхэр, IофшIэным кIэгъэгушIугъэнхэр ары. Ахэм ахахьэх колледжхэр ыкIи апшъэрэ еджапIэхэр къэзыухыгъэхэу опыт зыIэкIэмылъхэр, ныбжьыкIэхэу гурыт ыкIи апшъэрэ гъэсэныгъэ зимыIэхэр, сэкъатныгъэ зиIэхэр, ибэхэр, хьапсым къычIэкIыжьыгъэхэу зыныбжь имыкъугъэхэм яучет хэтхэр, нэмыкIхэри.
IофшIапIэ языгъэгъотыхэрэм апэрэ тыныр къазыIэкIэхьащтыр IофшIапIэм цIыфыр заштагъэм ыуж апэрэ, ящэнэрэ ыкIи яхэнэрэ мазэхэр зытекIыхэкIэ ары. Къэралыгъо IэпыIэгъур къафатIупщыным пае IофшIапIэ языгъэгъотырэ гупчэм зыфагъэзэн ыкIи IофшIэпIэ чIыпIэ нэкIэу яIэхэм яспискэ къагъэлъэгъон фае. Ащ ыуж субсидиехэм ятын фэгъэзэгъэ социальнэ страхованиемкIэ Фондым лъэIу тхылъ фагъэхьын фае.