Лъэпкъ проектэу «Псауныгъ» зыфиIорэм къыдыхэлъытэгъэ Iофтхьабзэу «Добро в село» зыфиIорэр Адыгеим щэкIо. Республикэм ичIыпIэ анахь чыжьэхэм ащыпсэухэрэм медицинэ IэпыIэгъу арагъэгъоты.

БэмышIэу общественнэ псауныгъэмкIэ ыкIи пэшIорыгъэшъ медицинэ Iэпы­Iэгъу ягъэгъотыгъэнымкIэ Гупчэм щылажьэхэрэмрэ волонтерхэмрэ Кощхьэблэ районым ит къуаджэу ХьакIэмзые щыIагъэх.

Iофтхьабзэм къыдыхэлъытагъэу гу-лъынтфэ системэр ыкIи тхьабылхэр ауплъэкIугъэх, уз зэфэ­шъхьафхэр къяузынхэмкIэ щынагъо щыIэмэ, ВИЧ-инфекцие яIэмэ агъэунэфыным фэшI экспресс-тестирование арагъэкIугъ. Инсультым пэшIуекIогъэным пае ар къызэузыгъэм апэрэ IэпыIэгъоу ищыкIагъэр зыдэт тхылъ цIыкIу­хэр волонтерхэм къекIо­лIагъэхэм аратыгъэх.

Къуаджэм щыпсэурэ нэбгырэ 30 фэдиз зэкIэмкIи ауплъэкIугъ. Нэбгырэ пэпчъ зыгъэгумэкIырэ лъэныкъом елъытыгъэу специалистхэм якIолIэнхэу араIуагъ.

— Волонтерхэм — медицинэ сэнэхьат зэзыгъэгъотырэ студентхэм — къе­кIолIагъэхэм анкетирование арагъэшIыгъ. Ащ ишIуагъэкIэ уз зэфэшъхьафхэр яIэнкIэ щынагъо щыIэмэ агъэунэфыгъ, ялъыдэкIуае ауплъэкIугъ. Къэлэ поликлиникэм екIолIэнхэ амал зэкIэми яIэп, ягуапэу къекIолIагъэх, зарагъэуп­лъэкIугъ, — еIо пэшIорыгъэшъ медицинэ IэпыIэгъумкIэ отделением ипащэу Джульетта Керим-Заде.

Мобильнэ бригадэр мэ­къуогъум и 30-м станицэу Дундуковскэм щыIагъ.