УФ-м ПенсиехэмкIэ ифонд и Къу­тамэу АР-м щыIэм Iэнэ хъураеу щыкIуагъэр зыфэгъэхьыгъагъэр илъэси 3 — 7 ыкIи илъэси 8 — 17 зыныбжь кIэ­лэцIыкIухэр е зихэхъогъухэр зэрыс унагъохэм ахъщэ IэпыIэ­гъоу къэралыгъом къаритырэр ары.

Iофтхьабзэм хэлэжьагъэх хэбзэ гъэцэкIэкIо органхэм, общественнэ организацие зэфэшъхьафхэм ялIыкIохэр, Къутамэм иотделхэм, игъэIорышIапIэхэм япащэхэр. УФ-м ПенсиехэмкIэ ифонд и Къутамэу АР-м щыIэм ипащэу МэщлIэкъо Хьамидэ ар зэрищагъ.

Шъугу къэдгъэкIыжьын, илъэси 3 — 7 зыныбжь кIэлэцIыкIу зэрыс унагъоу зигъот макIэхэм ахъщэ IэпыIэгъу мазэ къэс афэгъэкIогъэным УФ-м и Президентэу Владимир Путиныр кIэщакIо фэхъугъэу 2021-рэ илъэсым имэлылъфэгъу мазэ къыщегъэжьагъэу къаты. Джащ фэд, илъэси 8 — 17 зыныбжь кIэлэцIыкIу е зихэхъогъу зиIэхэм апае ахъщэ тынри къэралыгъом ипащэ иунашъокIэ тызхэт илъэсым агъэнэфагъ.

МэщлIэкъо Хьамидэ Iофтхьабзэр къы­зэIуихызэ, ахъщэ IэпыIэгъухэм апае лъэIу тхылъэу къаIэкIахьэрэр зэрэбэр къыIуагъ. Арэу щытми, законым къыдилъытэгъэ пIалъэхэм атетэу зэкIэми яIоф зэхэфыгъэ мэхъу, IэпыIэгъур темыфэу агъэунэфыгъэхэми джэуап зэхэугуфыкIыгъэ аратыным специалистхэр ыуж итых.

Мы Iофым фэгъэзэгъэ отделхэм япащэхэр къэралыгъо IэпыIэгъум итын зэрэлъагъэкIуатэрэм къытегущыIагъэх. Ахъщэр къыфэкIоным пае лъэIу тхылъхэр зэратыщт амалэу унагъохэм яIэхэр, ахэр къызтефэхэрэр къыхахынхэм пае унашъом къыщыдэлъытэгъэ шапхъэу ежьхэм агъэцэкIэн фаехэр къаIотагъ. Унагъом гъотэу иIэр ащ исхэм зэкIэми атегощагъэмэ, зы нэбгырэм къытефэрэр цIыфыр зэрыпсэун ылъэкIыщт ахъщэ анахь макIэм кIахьэмэ, хьауми ащ нахь макIэмэ ары анахь шъхьаIэу къыдалъытэрэр. Илъэси 3 — 7-м е 8 — 17-м къахиубытэу сабыитIу е нахьыбэ унагъом исмэ, нэбгырэ пэпчъ ахъщэ тыныр къыфэкIощт. Унагъом имылъкоу къыдалъытэхэрэм яспискэ УФ-м ПенсиехэмкIэ ифонд иинтернет нэкIубгъо хэти ригъотэщтэу ары къызэраIуагъэр.

ЦIыфыр зэрыпсэун ылъэкIыщт ахъщэ анахь макIэу Адыгеим щагъэнэфагъэр сомэ 11970-рэ. Къутамэм испециалистхэм къызэраIуагъэмкIэ, нэбгырэ 15951-мэ мы ахъщэ IэпыIэгъур афагъэпсыгъах. АхъщэкIэ къэплъытэмэ, зэкIэмкIи сомэ миллион 300-м ехъу ахэм афэкIо.

Общественнэ организациехэм япащэу къырагъэблэгъагъэхэм мы лъэныкъом фэгъэхьыгъэ упчIэхэр къатыгъэх, яеплъы­кIэхэмкIэ къадэгощагъэх.

ХЪУТ Нэфсэт.