Къэралыгъо автоинспекцием илъэс 30 хъугъэу щытхъу хэлъэу Iоф щызышIэрэ ПIатIыкъо Ичрам гущыIэгъу тыфэхъугъ. Ар гъогу-патруль къулыкъум иротэу N 1-м икомандир, полицием иподполковник.

Ичрам Шэуджэн районым ит къуаджэу Пщыжъхьаблэ къыщыхъугъ, щапIугъ. ШIу зыщызэрэлъэгъухэрэ, зыщызэгурыIохэрэ, адыгагъэр зыщагъэлъэпIэрэ унагъо кIалэр къихъу­хьагъ. Янэ-ятэхэу Ибрахьимрэ Бибэрэ чанэу зэдэлэжьагъэх, ялъфыгъэхэр гъогу занкIэ зэрэтыращэщтхэм ыуж итыгъэх. Зэшъхьэгъусэхэм нэбгыриплI зэдапIун, апшъэрэ гъэсэныгъэ арагъэгъотын алъэкIыгъ. Сыдигъуи пIуныгъэ-гъэсэныгъэр ным нахь фэгъэзагъ, Бибэ ар дэ­гъоу зэшIуихыгъ. Сыда пIомэ адыгабзэмкIэ кIэлэегъаджэу гурыт еджапIэм илъэс 30-рэ Iоф щи­шIагъ, бзэм игъусэу хабзэри исабыйхэм ахилъхьагъ. Ичрам янэ-ятэхэм афэразэу ягугъу къешIы.

— Iоф зысшIэрэ илъэс 30-м къыкIоцI тхьамэтабэмэ сарихьылIагъ, — къеIуатэ тигущыIэгъу. — Ахэм сызэрагурыIощтым, сиIофшIэн зэрэзгъэцэкIэщтым семызэщэу сыпылъ, а шэныр пIуныгъэу къытхалъхьагъэм щыщ, тянэ-тятэхэм тызэрагъэсагъэм тетэу сэпсэу.

Ичрам ищыIэныгъэ полицием рипхынэу зэрэхъугъэм ушъ­хьагъу гъэнэфагъэ иIагъ. ИцIыкIугъом къыщегъэжьагъэу ятэ фэягъ ар полицием хэхьанэу, шъуашэр дахэу щыгъынэу. Гурыт еджапIэри, дзэ къулыкъури къы­ухыхи, IофшIэн зэфэшъхьафхэр тIэкIурэ ыгъэцэкIагъэх. Апшъэрэ юридическэ гъэсэныгъи зэригъэгъотыгъ. Нэужым, 1993-рэ илъэсым жъоныгъуакIэм Адыгеим и Къэралыгъо автоинспекцие хэхьагъ, непэ къызнэсы­гъэм игуапэу къулыкъур ехьы.

ПIатIыкъо Ичрам апэ гъогу- патруль къулыкъум ихэушъхьафыкIыгъэ взвод старшэ инспекторэу IофшIэныр щыригъэжьагъ. Гъогум утетыныр, хъугъэ-шIагъэ­хэр къыхэбгъэщынхэр, цIыф зэ­фэшъхьафхэм гущыIэгъу уафэ­хъуныр IэшIэхмэ дэгъоу ешIэ. ЗэрэхъурэмкIэ, пэщэ IэнатIэм къыфэмыкIозэ, илъэси 10-рэ гъогум къулыкъур щи­хьыгъ. АР-м и ЛIышъхьэ игъусэу къекIокIыхэрэм ахэтыгъ.

— СищыIэныгъэ автоинспекцием зэреспхыгъэмкIэ зы мафи сыкIэгъожьэу къы­хэкIыгъэп, — еIо ротэм ипащэ. – Сыдигъуи автомобильхэр сикIасэх, ахэм япхыгъ сиIофшIэни. Арышъ, гухахъо хэзгъуа­тэу илъэс зэкIэлъыкIохэм къулайныгъэр къызIэкIэзгъахьэзэ Iоф сэшIэ. Автоинспектор сэнэхьатым угукIэ уфэмыщагъэу Iоф рыпшIэшъущтэп. Ар анахь лъэныкъо шъхьа­Iэхэм ащыщ.

Гъогум къулыкъур щыпхьыныр IэшIэхэп, джащ фэд, пэщэ Iэ­натIэ пIыгъыныр аукъодыеу щытэп. Ичрам зипэщэ ротэм нэбгырэ 64-рэ хэхьэ. Ахэм зэ­кIэми шэн зэфэшъхьаф яI, илъэс пчъагъэрэ Iоф щызышIагъэхэри, къыхэхьэгъакIэхэри ахэтых. Пстэуми екIолIэкIэ гъэнэфагъэ къафэбгъотынэу щыт.

— Сызипэщэ нэбгырэ 64-м зэкIэми ацIэ-алъэкъуацIэхэр, ятацIэхэр, якъэбархэр дэгъоу сэшIэх, — къеIуатэ тигущыIэгъу. — Зафэзгъазэ зыхъукIи ятацIэхэр пымытэу садэгущыIэрэп, ащ къеушыхьаты нэбгырэ пэпчъ лъытэныгъэ зэрэфэсшIырэр. НыбжьыкIэу къулыкъум къыхахьэхэрэм IэпэIэсэныгъэу сIэкIэлъыр зэрязгъэшIэщтым сыпылъ. Хэу­къоныгъэ горэхэр къахафэ­хэми, тызэгъусэу дэтэгъэзыжьы. ЦIыфым зэкIэри ышIэу къэхъурэп, сфэлъэ­кIыщтымкIэ садеIэ.

ПIатIыкъо Ичрам зипэщэ ротэр зыфэгъэзагъэр къалэу Мыекъуапэрэ Мыекъопэ районымрэ. Гъогу хъугъэ-шIагъэхэм ястатистикэ узыхаплъэкIэ, авариехэр мымакIэу зыщагъэунэфыхэрэм Мыекъопэ районыр ащыщ. ГущыIэм пае, мы илъэсыр къызщихьагъэм къыщыублагъэу хъугъэ-шIэгъэ 22-рэ Мыекъопэ районым къыщыхъугъ, ахэм нэбгыри 5 ахэкIодагъ, нэбгырэ 27-мэ шъобжхэр хахыгъэх. ИкIыгъэ илъэсым ебгъапшэмэ, а пчъагъэр тIэкIу нахьыб. Ар зэпхыгъэу полицием иподполковник къыхигъэщырэр машинэхэм япчъагъэ зэрахахъорэр ары.

— Мы аужырэ илъэситIур тштэмэ, зыгъэпсэфакIоу къушъхьэхэм къакIохэрэм япчъагъэ лъэшэу хэхъуагъ, — къеIуатэ Ичрам. — Гъогум ущызекIоныр хьылъэ зэрэхъугъэм къыхэкIыкIэ мафэ къэс чэщ-зымафэм нарядищмэ районым къулыкъур щахьы. Зыгъэпсэфыгъо мафэхэм хэушъхьафыкIыгъэ взводым инарядхэр тиIэпыIэгъух. Тэ тыз­фэгъэзагъэр гъогурыкIоным ишапхъэхэр зыукъо­хэрэр къыхэдгъэщын, пшъэ­дэкIыжь ядгъэхьын закъор арэп. ХьакIэу къа­кIохэрэм чIыопсым елъытыгъэу гъогум изытет зыфэдэр агурытэгъаIо, щынагъоу апэ къикIын ылъэкIыщтхэр, сакъыныгъэ къызхагъэфэн зэрэфаер ятэIо. ПэшIорыгъэшъ Iоф­тхьабзэхэр зэхэтэщэх. Гъо­гурыкIоныр щынэгъончъэныр, ащ хэлажьэхэрэм ящыIэныгъэ ыкIи япсауныгъэ къэухъумэгъэнхэм автоинспекциер ишъыпкъэу ыуж ит.

ПIатIыкъо Ичрам ипшъэрылъ щытхъу хэлъэу зэригъэцакIэрэм ишыхьатэу щытхъу ыкIи рэзэныгъэ тхылъхэмкIэ, медаль зэфэшъхьафхэмкIэ къыхагъэщыгъ. IофшIэным дакIоу унэгъо дахэ ышIэн ылъэкIыгъ. Ишъхьэгъусэу Маринэрэ ежьыррэ пшъэшъищ зэдапIугъ, нахьыжъитIумэ, Азэрэ Заринэрэ ящыIэныгъэ медицинэм рапхыгъ, анахьыкIэу Анжеликэ гурыт еджапIэу N11-м ия 9-рэ класс ис.

Гъэзетыр къызфигъэфедэзэ, Ичрам иIофшIэгъухэм, ветеранхэм (ахэр зыщагъэгъупшэхэрэп) ямэфэкI мафэкIэ афэгушIо. Пса­уныгъэ пытэрэ кIуачIэрэ яIэхэу, яунагъохэм адатхъэхэу, ядунай мамырэу щыIэнхэу афэлъаIо.

Iэшъынэ Сусан.

Сурэтыр Iэшъынэ Аслъан тырихыгъ.