Социальнэу мыухъумэгъэ цIыфхэу ахъщэ чIыфэ зытелъхэм яфитыныгъэхэр зэтегъэуцожьы­гъэнхэм, ахэм IэпыIэгъу афэхъугъэным афы­те­гъэпсыхьэгъэ Iэнэ хъурае АР-м и Прокура­турэ щыкIуагъ.

Iофтхьабзэр зэрищагъ АР-м ипрокурор игуадзэу Бэрэтэрэ Аслъан. Iэнэ хъураем хэлэжьагъэх АР-м IофшIэнымкIэ ыкIи социальнэ хэхъоныгъэхэмкIэ и Министерствэ, УФ-м ПенсиехэмкIэ ифонд и Къутамэу АР-м щыIэм, Сбербанкым, ВТБ-м якъутамэхэу Адыгеим итхэм, УФ-м ихьыкум приставхэм я ГъэIорышIапIэ кIэлэцIыкIухэм яфитыныгъэхэр къэухъумэгъэнхэмкIэ Уполномоченнэм иаппарат ялIыкIохэр.

Бэрэтэрэ Аслъан Iофтхьабзэр къызэIуихызэ къыкIигъэтхъыгъ прокуратурэм иIофшIэн апэрапшIэу зыфэгъэзагъэр кIэ­лэцIыкIухэм, джащ фэдэу социальнэу мыухъумэгъэ цIыфхэм (ахэм ахэхьэх гъот макIэ зиIэ унагъохэр, сабыибэ зиIэхэр ыкIи федеральнэ хэбзэгъэуцугъэм къызэригъэнафэу социальнэ IэпыIэгъу зищыкIэгъэ унагъохэр) яфитыныгъэхэр къэухъу­мэгъэнхэр. Анахьэу прокуратурэм ынаIэ зытыригъэтырэр ыпшъэкIэ зигугъу къэтшIыгъэ купхэм ахахьэхэу социальнэ тын къызыратыхэрэм егъэзыгъэ Iоф хэлъэу чIыфэр къарамыгъэ­тыжьыныр ары.

Мы лъэныкъомкIэ хэбзэгъэуцугъэу щыIэхэр зэрагъэцакIэрэм къытегущыIагъ зыныбжь имыкъугъэхэм ыкIи ныбжьыкIэхэм яхэбзэ фитыныгъэхэм ягъэцэ­кIэнкIэ ыкIи алъыплъэнымкIэ АР-м ипрокурор иIэпыIэгъоу Елена Алексейцевар. Ащ къызэриIуагъэмкIэ, 2022-рэ илъэсым мэкъуогъум и 1-м ехъулIэу УФ-м ихьыкум приставхэм я ГъэIорышIапIэу АР-м щыIэм ыгъэцэкIэн фаеу Iоф 254-рэ IэкIэлъ. ЧIыфэ зытелъхэм яяблэ­нэрэ пэпчъ социальнэу мыухъу­магъэхэр ары. АгъэцэкIэн фэе тхьапэхэм япроценти 10-р сэкъатныгъэ зиIэхэм, зыныбжь имыкъугъэхэм, сыбыибэ ыкIи гъот макIэ зиIэ унагъохэм афэгъэхьыгъ.

Социальнэу мыухъумэгъэ цIыфхэм чIыфэр къарагъэты­жьыным фэшI хэбзэукъоныгъэу зэрахьэхэрэм афэгъэхьыгъэ щысэхэр къыхьыгъэх Е. Алексейцевам. ГущыIэм пае, кIэлэцIыкIухэм мазэ къэс къаратырэ тынхэм банкым зэрахиубытыкIырэм фэгъэхьыгъэу 2021-рэ илъэсым нэбгыритIумэ прокуратурэм зыкъыфагъэзагъ. Мыщ епхыгъэу уплъэкIунхэр ашIы­гъэх ыкIи кIэлэцIыкIухэм яахъщэу хэ­бзэнчъэу банкым хиубытыкIыгъэр къафызэкIагъэкIожьыгъ.

Тэхъутэмыкъое районым щыпсэурэ бзылъфыгъэм исчет илъыгъэ ахъщэр джащ фэдэу хьыкум приставхэм яунашъокIэ рахыгъ, сэкъатныгъэ зиIэ кIэлэцIыкIум ипенсие зэрэхэтэу. Хъугъэ-шIагъэ пэпчъ ща­гъэу­нэфыгъ кIэлэцIыкIухэм яахъ­щэ ыкIи социальнэ тынхэр банкым хиубытыкIыгъэхэу. Про­куратурэм уплъэкIунэу ышIы­гъэхэм къакIэлъыкIоу хэукъоны­гъэхэр дагъэзыжьыгъэх.

Нэужым мы Iофым фэгъэ­хьыгъэу къэгущыIагъэх упол­номоченнэ къулыкъухэм ыкIи учреждениехэм ялIыкIохэр.

Iэнэ хъураем хэлэжьагъэхэм яеплъыкIэхэмкIэ зэхъо­жьыгъэх ыкIи хэбзэукъоныгъэ­хэм алъэ­ныкъокIэ пэшIоры­гъэшъ Iофтхьабзэхэр зехьэгъэнхэм мэхьанэшхо зэриIэр къыхагъэщыгъ.

КIарэ Фатим. Сурэтыр тезыхыгъэр Iэшъынэ Аслъан.