Лъэпкъ проектэу «Псауныгъэр къэухъумэгъэныр» зыфиIо­­рэм ишъолъыр программэу «Гу-лъынтфэ узхэм апэшIуекIо­гъэныр» зыцIэм къыдыхэлъытэгъэ Iофтхьабзэхэу Адыгэ рес­пуб­ликэ клиническэ сымэджэщым хэт гупчэм изэтегъэпсы­хьан епхыгъэхэр аухыгъэх.

2022-рэ илъэсым Iэмэ-псымищ кIэу ащ чIагъэуцуагъ. Ахэм сомэ миллион 77,4-рэ апэIухьагъ. ЗэкIэмкIи «Гу-лъынтфэ узхэм апэшIуекIогъэныр» зыфиIорэ программэм къыдыхэлъытагъэу мы илъэсым сомэ миллион 83,5-рэ аосэ орудование ащэфыгъ.

Мыекъопэ къэлэ клиническэ сымэ­джэщым зепхьан плъэкIыщт УЗИ аппарат, Адыгэкъалэ дэт сымэджэщэу К. М. Батмэным ыцIэ зыхьырэм тхьабылхэм жьы къазэрэрагъэщэрэ ыкIи жьыкъэ­щэныр зэрауплъэкIурэр зыхэт ИВЛ-аппарат къафащэжьынхэу щыт.

— Лъэпкъ проектым къыдыхэлъытэгъэ Iофтхьабзэхэм ягъэцэкIэн лъэшэу тылъэ­плъэ. Ахэр щыIэныгъэм щыпхырыщыгъэ зэрэхъущтым мэхьанэ ин иI, — еIо псау­ныгъэр къэухъумэгъэнымкIэ министрэм иапэрэ гуадзэу Максим Коробко.