Гъэсэныгъэ зыщарагъэгъотырэ организациехэм ачIэсхэм, кIэлэеджакIохэмрэ студентхэмрэ ясоциальнэ-психологическэ зытет иуплъэкIун фэхъугъэ кIэуххэм, хэбзэнчъэу наркотикхэр зэрагъэзекIохэрэм пэуцужьыгъэнымкIэ культурэм иучреждениехэм Iофтхьабзэу зэрахьэхэрэм ыкIи нэмыкI Iофыгъохэм щатегущыIагъэх терроризмэм пэшIуекIорэ комиссиеу республикэм щызэхэщагъэм джырэблагъэ иIэгъэ зэхэсыгъом.

Зэхэсыгъом хэлэжьагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, Адыгеим и Премьер- министрэ ипшъэрылъхэр зыгъэцакIэу КIэрэщэ Анзаур, АР-м ипрокуратурэ, МВД-м, УФСБ-м япащэхэр, министрэхэм я Кабинет хэтхэр, Адыгэ республикэ наркодиспансерым, муниципальнэ образованиехэм япащэхэр.

Адыгэ Республикэм гъэсэныгъэмрэ шIэныгъэмрэкIэ и Министерствэ ипащэ, АР-м псауныгъэр къэухъумэгъэнымкIэ иминистрэ къызэраIуагъэмкIэ, мы илъэсым зыныбжь имыкъугъэ нэбгыри 4-мэ наркотикхэм япхыгъэ бзэджэшIагъэхэр зэрахьагъэ­хэу къыхагъэщыгъ. Илъэс еджэгъум социальнэ-психологическэ уплъэкIунэу ашIыгъэм студентхэм ыкIи кIэлэеджакIохэм япроцент 85-рэ фэдиз къыхиубытагъ. Ушэтыным икIэуххэм нафэ къы­зэрашIыгъэмкIэ, нэбгырэ 384-кIэ ащ фэдэ бзэджэшIагъэм хэщагъэ хъунхэм ищынагъо ашъхьащытэу къыхагъэщыгъ. Ахэм уплъэкIун тедзэхэр адызэрахьагъэх. Мы илъэсым зыныбжь имыкъугъэхэмкIэ комиссием IэтэхъуитIу психиатр-наркологыр къяплъынэу ыгъэкIо­гъагъ. Ахэм зэдэгущыIэгъу гъэ­­нэфагъэхэр адашIыгъэх.

Адыгеим и ЛIышъхьэ пшъэ­рылъ афишIыгъ социальнэ-психологическэ уплъэкIуным фэ­­гъэ­зэгъэщт цIыфхэм япчъагъэ нахьыбэ шIыгъэнэу.

«НыбжьыкIэхэм азыфагу наркоманием зызэрэщиушъом­бгъу­рэм къыпкъырыкIырэ гу­мэкIыгъохэр ары анахьэу зэ­хэсыгъом анаIэ зыщытырагъэтын фаехэр. ЕджакIохэм ыкIи студентхэм а уз щынагъом пыщагъэхэм япчъа­гъэ нахьыбэ мышIыгъэнымкIэ ады­зэрахьэрэ Iофтхьабзэхэр агъэлъэшынхэ фае. МыщкIэ чIыпIэхэм яIэшъхьэтетхэм, хэбзэухъумэкIо къулыкъухэм, психологхэм, ны-тыхэм, наркологхэм ыкIи общественнэ организацием акIуачIэ зэхэлъэу Iофтхьэбзэ гъэнэфагъэ­хэр зэшIуамыххэ хъущтэп. ПIуныгъэ Iоф­шIэнымкIэ пшъэ­дэкIыжь зыхьыхэрэми нахь тэрэзэу а лъэныкъом анаIэ тырагъэтын фае», — къыIуагъ КъумпIыл Мурат.

Хэбзэнчъэу наркотикхэр къы­зэрэрагъэкIокIхэрэм пэуцужьыгъэным пае культурнэ-просветительскэ учреждениехэм Iофэу ашIэрэм къытегущыIагъ Адыгэ Республикэм культурэмкIэ и Министерствэ ипащэ. Мы илъэсым наркотикхэм апэшIуекIорэ Iофтхьабзэхэр къыдэзылъытэхэрэ видеороликхэр кинохэм яублэгъум арагъэлъэгъухэзэ ашIыщт. Илъэс къэс муниципалитетхэм якинозалхэм Iофтхьабзэу «Кинематограф против наркотиков» зыфиIорэр ащэкIо. Мы илъэсыр къызихьагъэм къыщыублагъэу Iофтхьэбзэ 560-м ехъу зэха­щагъ, ахэр зыфэгъэхьыгъэхэр ешъонымрэ наркоманиемрэ тицIыфхэр ащыухъумэгъэнхэр, щыIэкIэ-псэукIэ тэрэзыр пропагандэ шIыгъэныр ары.

«Пшъэрылъ шъхьаIэу тиIэр Iэтахъохэм гаджетхэр бэрэ амыгъэфедэнхэр, урамым зэра­рэу къыхьын ылъэкIыщтым ыкIи мыхъо-мышIэгъэ зэфэ­шъхьафхэм ащыухъумэгъэнхэр ары. Общественностым илIыкIохэу нахь шъхьэкIэфэ ин зы­фа­шIыхэрэр мы IофымкIи къызфагъэфедэнхэ фае. Культурэм иучреждениехэм яинфраструктурэ хэпшIыкIэу дгъэ­кIэжьыгъ, ахэри амал зэриIэкIэ нахь игъэкIотыгъэу а IофшIэным къы­хэтымыгъэлажьэхэ хъущтэп», — къыIуагъ КъумпIыл Мурат.

Адыгэ Республикэм и ЛIышъхьэрэ Адыгэ Республикэм иминистрэхэм я Кабинетрэ я Администрацие ипащэу Владимир Свеженец къыIотагъ наркотикхэм апэшIуекIорэ форумым изэхэщэнкIэ республикэм ипащэ къыгъэуцугъэ пшъэрылъхэр гъэ­цэкIагъэ зэрэхъухэрэм фэгъэ­хьыгъэу. ЗэрэгугъэхэрэмкIэ, мы илъэсым чъэпыогъум ар зэхащэщт, Къэралыгъо филармонием ар щыкIощт, IэпэIэсэныгъэ ин зиIэ IофышIэхэр, кIэлэеджакIохэр ыкIи студентхэр бэу ащ къырагъэблэгъэщтых. Наркотикхэм апэшIуекIогъэнымкIэ социальнэ роликхэр ыкIи репортаж хэу­шъхьафыкIыгъэхэр къагъэлъэ­гъощтых. Муниципальнэ образование пстэуми яныбжьыкIэхэр нахьыбэу къыхагъэлажьэхэзэ а Iофтхьабзэр зэхащэнэу респуб­ликэм и ЛIышъхьэ пшъэрылъ къыгъэуцугъ.

Гъэмэфэ зыгъэпсэфыгъохэм ялъэхъан гъэсэныгъэм, псауныгъэм икъэухъумэн, культурэм ыкIи спортым ялIыкIохэр хэлажьэхэзэ, наркотикхэм апэшIуе­кIорэ IофшIэным нахь зырагъэ­ушъомбгъун зэрэфаем игъэкIотыгъэу КъумпIыл Мурат къытегущыIагъ. МыщкIэ гурыгъэIон IофшIэныр агъэлъэшынэу, «группа риска» зыфаIорэм къыпкъырыкIхэзэ социальнэ-психологическэ уплъэкIунэу зэхащэхэрэм якIэуххэм ялъытыгъэу а IофшIэныр агъэлъэшынэу пшъэрылъ къыгъэуцугъ.