Къэлэ кIыбым щыIэ лагерьхэм кIэ­лэцIы­кIухэм ягъэмэфэ зыгъэпсэфыгъо уахътэ зэращызэ­ха­щэрэм Адыгеим лъэшэу анаIэ щыты­рагъэты. Адыгеим и ЛIышъхьэу КъумпIыл Мурат лагерьхэу «Лань», «Горный» зыфиIохэрэм ты­гъуа­сэ ащыIагъ, кIэ­лэ­цIыкIухэм зызэ­рагъэпсэфырэм зы­щигъэгъозагъ.

Iофтхьабзэм хэлэжьагъэх федеральнэ инспектор шъхьаIэу Сергей Дрокинымрэ АР-м Iоф­шIэнымрэ социальнэ хэхъоныгъэмрэкIэ иминистрэу Мырзэ Джанбэчрэ.

Зигугъу къэтшIыгъэ лагерьхэр республикэм икъушъхьэлъэ чIыпIэхэм ащыIэх. Защагъэпсэфынэу ахэм нэбгырабэ къякIуа­лIэ. Лагерэу «Лань» зыфиIорэм ятIонэрэ потокымкIэ кIэлэцIыкIу 293-мэ зыщагъэпсэфы, ахэм ащыщэу нэбгырэ 285-мэ путевкэхэмкIэ, кIэлэцIыкIуи 8-мэ – программэу «КIэлэцIыкIу кеш­бэк» зыфиIорэмкIэ. Лагерэу «Горнэм» сабый 363-мэ зыщагъэпсэфы, ахэм ащыщэу нэбгырэ 355-мэ путевкэхэмкIэ, кIэлэцIыкIуи 8-р – программэу «КIэлэцIэкIу кешбэк» зыфиIо­рэмкIэ. Донбасс щыщ кIэлэцIыкIухэм шышъхьэIум мы лагерьхэм защагъэпсэфынэу щыт.Республикэ бюджетым имылъкукIэ къалэм дэдзыгъэ лагерьхэм зызэращагъэпсэфыщт путевкэ 350-рэ къащэфынэу ра­хъухьэ. Республикэм и ЛIышъхьэ кIэлэцIыкIу лагерьхэр къыплъы­хьагъэх, зызыгъэпсэфырэ кIэлэцIыкIухэм, лагерьхэм яIофышIэхэм адэгущыIагъ, языгъэ­псэфыгъо уахътэ зэрэзэхащэрэм нэIуасэ зыфишIыгъ, Адыгеим ия 100-рэ илъэс фэгъэхьыгъэ тематическэ Iофтхьабзэхэм ащы­Iагъ.

ГущыIэм пае, лагерэу «Лань» зыфиIорэм къалэу Мыекъуапэ искусствэхэмкIэ иеджапIэ къе­кIуалIэхэрэм ясурэтшIыгъэхэм якъэгъэлъэгъон къыщызэIуа­хыгъ, адыгэ къашъомкIэ ансамблэу «Абреки», ансамблэу «Казачата» зыфиIохэрэм ахэтхэр кIэлэцIыкIухэм яхьэкIагъэх. Тематическэ станциеу «Адыгея – моя малая Родина!» зыфиIорэм кIэлэцIыкIухэм апае бисер хъэ­нымкIэ, къошын гъэжъэнымкIэ, дышъэ хэдыкIынымкIэ мастер-класс зэфэшъхьафхэр щы­зэхащагъэх.

ЗекIо-краеведческэ лагерэу «Горный» зыфиIорэм тематическэ джэгукIэу «Тэ тыпатриот цIыкIу» зыфиIорэм къыдыхэлъы­тэгъэ станциехэр щызэхаща­гъэх, патриотическэ орэдхэр линейкэм къыщаIуагъэх, кIэлэцIыкIу­хэм адыгэ, урыс лъэпкъ къашъо­хэр къашIыгъэх. Адыгеим и ЛIышъхьэ ятIонэрэ потокымкIэ дружинэхэм Iоф зэрашIэрэр, кIэлэцIыкIухэм ягъэшхэнкIэ ыкIи языгъэпсэфынкIэ амалэу щыIэ­хэр зэригъэшIагъэх.

Лагерьхэм ащыIэ кIэлэцIыкIухэм экскурсиехэр, зекIо зэ­фэшъхьафхэр, псауныгъэм, спортым, творчествэм атегъэ­псыхьэгъэ Iофтхьабзэхэр зэрафызэхащэхэрэр ягуапэу къа­Iотагъ. ДжэгукIэ лъэпкъхэр агъэфедэхэзэ, кIэлэцIыкIухэм амалэу яIэхэм зыкъызэIуягъэ­хыгъэным мэхьанэшхо зэриIэр Адыгеим и ЛIышъхьэ къыхигъэ­щыгъ.

Адыгэ къэралыгъо университетым истудентхэр вожатэхэу зэраштэрэр зэригуапэр КъумпIыл Мурат къыIуагъ. Адыгеим и ЛIышъхьэ игъо афилъэгъугъ кIэлэцIыкIухэм языгъэпсэфыгъо уахътэ изэхэщэнкIэ шIыкIакIэхэр къагъотынэу, хэбзэ къулыкъу­хэм зэхащэгъэ социальнэ инфраструктурэр мыщкIэ икъоу къыз­фагъэфедэнэу: кинозалыкIэхэм, культурэмкIэ унэхэу, музейхэу, театрэхэу агъэцэкIэжьыгъэхэм кIэлэцIыкIухэр ащэнхэу.

«Ны-тыхэм яцыхьэ телъын фае якIэлэцIыкIухэм дэгъоу мыщ фэдэ лагерьхэм зызэращагъэ­псэфыщтхэм, япсауныгъэ зэрэщагъэпытэщтым. ЗиIоф хэшIыкIышхо фызиIэхэм ахэм анаIэ атетыщт, язы­гъэпсэфыгъо уахътэ гъэшIэгъонэу афызэха­щэщт. Гъэмэфэ зыгъэ­псэфыгъо лъэхъаным кIэлэцIыкIухэм нахьыбэу гухахъо агъотын, кIэлэцIыкIу лагерьхэр шIукIэ агу къинэжьын фае», — къыIуагъ Адыгеим и ЛIышъхьэ.

2022-рэ илъэсым кIэлэцIыкIухэм языгъэпсэфыгъо уахътэ зэхэзыщэрэ ыкIи япсауныгъэ зыщагъэпытэрэ организацие 94-мэ республикэм Iоф щашIэ. Ахэм ащыщэу лагерищыр — «Горная», «Лань», «Горная легенда» зыфиIохэрэр къэлэ кIыбым щыIэх. КIэлэцIыкIу мини 2,6-м ехъумэ ахэм защагъэпсэфыщт, мафэрэ Iоф зышIэрэ лагерьхэм кIэлэцIыкIу мини 5 якIолIэщт. КIэлэцIыкIухэм языгъэпсэфыгъо уахътэ изэхэщэн пае сомэ миллион 90,3-рэ къы­хагъэкIыгъ. АР-м и ЛIышъхьэ ипресс-къулыкъу