Лъэныкъо зэфэшъхьафхэм анэсыгъэх
АР-м и Къэралыгъо Совет – Хасэм я XII-рэ зэхэсыгъоу иIагъэр, зэрэхабзэу, ащ и Тхьаматэу Владимир Нарожнэм зэрищагъ. АР-м иминистрэхэм я Кабинет хэтхэр, федеральнэ ыкIи шъолъыр къулыкъухэм япащэхэр хэлэжьагъэх.
2021-рэ илъэсым республикэм ыкIи шIокI зимыIэ медицинэ страхованиемкIэ ЧIыпIэ фондым ябюджетхэр гъэцэкIагъэ зэрэхъугъэхэм афэгъэхьыгъэ докладхэм мы зэхэсыгъом щядэIугъэх. АР-м финансхэмкIэ иминистрэу Виктор Орловым къызэриIуагъэмкIэ, республикэм ибюджет ихахъохэр сомэ миллиард 35,4-рэ хъущтыгъэх, хъарджхэр сомэ миллиард 33,4-м ехъущтыгъ. Хахъохэм анахьи сомэ миллиардрэ миллион 599-м ехъукIэ хъарджхэр нахь мэкIагъэх. Бюджет ахъщэр лъэныкъоу зыпэIуагъэхьагъэхэми кIэкIэу министрэр къатегущыIагъ.
ШIокI зимыIэ медицинэ страхованиемкIэ ЧIыпIэ фондым ипащэу Хъут Светланэ зэрэщигъэгъозагъэхэмкIэ, сомэ миллиарди 6-рэ миллион 744-м ехъущтыгъ ябюджет, хъарджхэри ащ фэдиз хъугъэх.
АР-м и УплъэкIокIо-лъытэкIо палатэ мы бюджетхэр гъэцэкIагъэ зэрэхъугъэр ыуплъэкIугъ. Ащ ипащэу Павел Стаценкэм зэхэсыгъом къызэрэщиIуагъэмкIэ, хэукъоныгъэ зыпари къыхагъэщыгъэп, зэрагъэнэфэгъагъэм тетэу ахъщэхэр гъэфедагъэ хъугъэ.
Зы джэпсалъэ зэхэсыгъом щытегущыIэхи, щаштагъ. Урысые политическэ партиехэу «Единэ Россием», КПРФ-м, ЛДПР-м ыкIи «Новые люди» зыфиIорэм япащэхэм ар афэгъэзагъ. Рекламэхэр, мэкъэгъэIухэр, нэмыкIэу псэуалъэхэм къапалъэхэрэр урысыбзэкIэ тхыгъэнхэу, IэкIыб къэралыгъуабзэхэр амыгъэфедэнэу унашъо штэгъэным ар фэгъэхьыгъ.
Мыщ фэгъэхьыгъэу къэгущыIэгъэ депутатхэм Адыгеим къэралыгъобзитIу, урысыбзэмрэ адыгабзэмрэ, зэриIэр къыхагъэщызэ, ахэм ащыщ амыгъэфе- дэу, процент 80-р инджылызыбзэкIэ зэрэтхыгъэр зэрэмытэрэзым къыкIагъэтхъыгъ.
Джащ фэдэу Къэралыгъо Советым — Хасэм и Регламент, АР-м и ЛIышъхьэ ыкIи Парламентым идепутатхэм яхэдзынхэм, 2022-рэ илъэс бюджетым, депутат статусым, общественностым ыкIи Къэралыгъо Советым — Хасэм ялIыкIохэу хьыкумышIхэм яквалификационнэ коллегие хэтыщтхэм, къэралыгъо къулыкъу IэнатIэу Парламентым и Аппарат хахьэхэрэм, хэбзэихъухьэхэм я Советэу ащ щызэхэщагъэм, нэмыкI лъэныкъохэм афэгъэхьыгъэ хэбзэихъухьагъэхэм зэхъокIыныгъэхэр афэшIыгъэнхэм фэгъэхьыгъэ законопроектхэр, законхэр апэрэ ыкIи ятIонэрэ еджэгъухэмкIэ аштагъэх.
НэмыкI субъектхэм яхэбзэихъухьэ органхэр кIэщакIо зыфэхъугъэхэми тидепутатхэр ахэплъагъэх, адырагъэштагъ. ХЪУТ Нэфсэт.