ЯтIонэрэ чэзыур аублагъ
Мэкъуогъум и 20-м къыщегъэжьагъэу кIэлэцIыкIухэм зызыщагъэпсэфырэ ыкIи япсауныгъэ зыщагъэпытэрэ лагерьхэм ятIонэрэ чэзыур рагъэжьагъ.
Мыекъопэ районым ит зыгъэпсэфыпIэхэу «Лань» ыкIи «Горная» зыфиIохэрэм кIэлэцIыкIухэр якIолIагъэх.
АР-м IофшIэнымкIэ ыкIи социальнэ хэхъоныгъэмкIэ и Министерствэ къызэритырэмкIэ, ятIонэрэ чэзыум зэкIэмкIи кIэлэцIыкIу 657-мэ загъэпсэфыщт.
Социальнэ хэхъоныгъэмкIэ Комплекснэ гупчэм ихэушъхьафыкIыгъэ отделениеу республикэм ирайонхэм ыкIи икъалэхэм адэтхэм яспециалистхэм кIэлэцIыкIухэр лагерьхэм аращэлIагъэх.
— Гъэмэфэ зыгъэпсэфыгъо лъэхъаныр кIэлэцIыкIухэм лагерым щагъэкIоныр якIас. Ахэм яуахътэ гъэшIэгъонэу, шIуагъэ къытэу зэрафызэхащэщтым республикэр ыуж ит. Щынэгъончъэным лъэшэу анаIэ тет. Художественнэ, техническэ ыкIи социальнэ творчествэм ылъэныкъокIэ зыныбжь имыкъугъэхэм Iоф адашIэ.