Мэкъуогъум и 12-р — Урысыем и Маф
Адыгэ Республикэм щыпсэухэу лъытэныгъэ зыфэтшIыхэрэр!
Урысыем и Мафэ фэшI тышъуфэгушIо!
Урысыеу тарихъ гъогушхо къызэпызычыгъэм ичэзыукIэ ублагъэ зэрэхъугъэм, цIыф лъэпкъ зэфэшъхьафыбэ зыхэхьэрэ тинарод ихэбзэ шIагъохэр зэрэзэпхыгъэхэм, лIэужыбэмэ яIофшIэнкIэ, ялIыхъужъныгъэкIэ агъэпсыгъэ ти Хэгъэгу зэрэлъэшым ятамыгъэу щыт мы Мафэр. Тинахьыжъхэм якIэнышхо къэтыухъумэзэ, ахэм лъэпсэ шIагъоу тихэгъэгу фашIыгъэр нахь дгъэпытэзэ, къыткIэхъухьащтхэм джыри ахэм нахь ахагъэхъонымкIэ амалышIухэр ятэгъэгъотых. Тиреспубликэ гъогоу къыкIугъэр Урысыем зэпичыгъэ гъогум кIэрыпчын плъэкIынэу щытэп. Адыгеим къэралыгъо гъэпсыкIэ иIэ зыхъугъэм ия 100-рэ илъэс мыгъэ хагъэунэфыкIыщт. Урысые Федерацием изы шъолъырхэм ащыщ Адыгеим иIахь гъэнэфагъэ хешIыхьэ къэралыгъом игъэпытэн, ащ иэкономикэ зыкъыIэтыным ыкIи цIыфхэм ящыIакIэ нахьышIу хъуным. Тихэгъэгу джыри нахь зэтегъэпсыхьагъэ хъунымкIэ лъэпкъ зэфэшъхьафыбэу ащ щыпсэухэрэм акIуачIэ зэрэзэрагъэуIущтым тицыхьэ телъ. ТичIыпIэгъу лъапIэхэр, тыгу къыддеIэу тышъуфэлъаIо псауныгъэ пытэ, щыIэкIэшIу шъуиIэнэу, мамыр ошъогур шъуашъхьагъ итынэу, Адыгеимрэ Урысыемрэ яфедэ зыхэлъ IофшIэным гъэхъагъэхэр щышъушIынхэу! Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат. Адыгэ Республикэм и Къэралыгъо Совет —Хасэм и Тхьаматэу Владимир Нарожнэр