Урысыем и Мафэ ехъулIэу республикэм и Къэралыгъо филар­моние щыкIогъэ Iоф­тхьабзэу Адыгеим и ЛIышъхьэу КъумпIыл Му­рат зыхэлэжьагъэм Урысые Федерациемрэ Адыгэ Республикэмрэ якъэралыгъо тынхэр щаратыжьыгъэх.

Къэралыгъо тынхэр къызыфагъэшъошагъэхэм ахэхьэх врачхэр, кIэлэегъаджэхэр, псэолъэшIхэр, юристхэр, культурэм иIофышIэхэр, къэралыгъо къулыкъушIэхэр, журналистхэр, хэбзэухъумэкIо къулыкъухэм яIофышIэхэр.

Къэзэрэугъоигъэхэм зафи­гъазэзэ Адыгеим и ЛIышъхьэ зэрэхигъэунэфыкIыгъэмкIэ, къэралыгъо тынхэр къызыфа­гъэшъошагъэхэм республикэм ихэхъоныгъэ яIахьышхо ха­шIы­хьагъ.

«ШъуиIофшIэнкIэ, шъуитворчествэкIэ, шъуинаучнэ Iоф­шIа­гъэхэмкIэ, общественнэ-политикэ щыIэныгъэм чанэу шъу­зэ­рэхэлажьэрэмкIэ тиреспубликэ ищытхъу яшъогъаIо. Экономикэ, социальнэ зэхъокIыныгъэхэм шъуиIахь ахэшъошIыхьэ. Сыд фэ­дэ къиныгъуи шъузышъхьамысыжьэу зэшIошъухын зэрэшъулъэкIырэмкIэ щысэтехыпIэшIоу шъущыт», — къыIуагъ КъумпIыл Мурат.

Адыгеим и ЛIышъхьэ псауныгъэм икъэухъумэн фэгъэзагъэхэм дэгъоу Iоф зэрашIэрэр къыхигъэщыгъ. Урысыем и Пре­зидентэу Владимир Путиным и УказкIэ илъэсыбэ хъугъэу Iоф зэрашIэрэм, ясэнэ­хьаткIэ гъэ­хъагъэхэр зэряIэхэм афэшI щыт­хъуцIэу «Урысые Федерацием изаслуженнэ врач» зыфиIорэр Адыгэ республикэ кIэлэцIыкIу клиникэ сымэджэщым иотделениехэм япащэхэу Пщыпый Сарэрэ ХьацIэцIэ Эм­мэрэ афагъэшъошагъ.

Псауныгъэм икъэухъумэн иIахьышхо зэрэхишIыхьэрэм фэшI Мыекъопэ район сымэджэщым хирургиемкIэ иотделение ипащэу Виктор Переверзевым Адыгэ Республикэм и ЛIышъхьэ и УказкIэ щытхъуцIэу «Адыгэ Республикэм инароднэ врач» зыфиIорэр къыфагъэшъошагъ.

Урысые общественнэ движениеу «Народнэ фронт «За Россию» зыфиIорэм ишъолъыр гъэцэкIэкIо комитет ипащэу Юрий Гороховым Урысыем и Президент ирэзэныгъэ тхылъ къызэрэфагъэшъошагъэр КъумпIыл Мурат къыхигъэщыгъ. Ащ зэрэхигъэунэфыкIыгъэмкIэ, пан­демием илъэхъан общественнэ организацием ипащэ волонтерхэм яштабхэр яIофшIэнкIэ ыгъэгъозагъэх, медицинэ учреж­дениехэм яIофышIэхэм чанэу IэпыIэгъу афэхъугъ.

ЯIофшIэнкIэ гъэхъагъэу яIэ­хэм фэшI хэгъэгум и Президент ирэзэныгъэ тхылъхэр къафа­гъэшъошагъэх Мыекъопэ троллейбус гъэIорышIапIэм иводителэу Наталья Гречко, пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Архиград» зыфиIорэм имашинистэу Гъунажьэкъо Ас­кэрбый.

Хэгъэгум иобщественнэ-поли­тикэ щыIэныгъэ чанэу зэрэ­хэ­лажьэхэрэм фэшI Адыгэ Рес­публикэм и Общественнэ палатэ хэтхэу Барцо Тимур, Бзэджэ­жъыкъо Абрек, Анна Крюковам Урысыем и Президент ирэзэныгъэ тхылъхэр къафагъэшъошагъэх.

Iофтхьабзэм икIэухым Адыге­им и ЛIышъхьэ Урысыем и МафэкIэ къэзэрэугъоигъэхэм къа­фэгушIуагъ, яIофшIэн тапэкIи гъэхъэгъакIэхэр щашIынэу, шIоу щыIэр къадэхъунэу къафэлъэ­Iуагъ.

«Гъэхъагъэу шъуиIэхэм джыдэдэм тапашъхьэ ит пшъэрылъхэм язэшIохын закъоп мэхьа­нэшхо зыкIыряIэр. Ахэр тапэкIи къышъушъхьапэжьыщтых, Адыгейми, хэгъэгуми ятекIоныгъэхэмрэ ягъэхъагъэхэмрэ лъа­псэ ахэр афэхъущтых», — къы­Iуагъ КъумпIыл Мурат къэра­лыгъо тынхэр зыфагъэшъошагъэхэм зафигъазэзэ.

Джащ фэдэу Iофтхьабзэм хэлэжьагъэх АР-м и Премь­ер-министрэ ипшъэрылъхэр зыгъэ­цакIэу КIэрэщэ Анзаур, фе­деральнэ инспектор шъхьаIэу Сергей Дрокиныр, Урысые Фе­дерацием и Общественнэ палатэ хэтэу МэщбэшIэ Исхьакъ, АР-м иминистрэхэм я Кабинет хэтхэр.

ЗэкIэмкIи агъэшIуагъэр лъэныкъо зэфэшъхьафхэмкIэ гъэ­хъагъэ зышIыгъэ нэбгырэ 34-рэ. Ахэм ацIэхэр тисайт ижъугъо­тэщтых: www. adygvoice.ru.

Адыгэ Республикэм и ЛIышъхьэ ипресс-къулыкъу Сурэтыр А. Гусевым тыри­хыгъ.