Республикэм икIэлэеджа­кIохэр Урысыем ицIыф зэрэ­хъугъэхэр къэзыушыхьатырэ паспортхэри правительствэм и Унэ щаратыжьыгъэх.

Адыгеим и ЛIышъхьэу КъумпIыл Мурат ахэм шIуфэс арихызэ къызэрэхигъэ щыгъэмкIэ, непэрэ мафэр адрэхэм афэдэп, егъэшIэрэу ныбжьыкIэхэм ар агу къинэщт.

«Тихэгъэгу икъэралыгъо мэфэкI шъхьаIэ — Урысыем и Мафэ къызщыблагъэрэм ехъу­лIэу мы Iофтхьабзэр зэрэкIорэм мэхьэнэ гъэнэфагъэ иIэу щыт. Сыгу къыздеIэу зэкIэми сы­шъуфэгушIо ыкIи паспортхэр къышъостыжьхэзэ Урысые Федерацием игражданин шъу­зэ­рэхъугъэр къыхэсэгъэщы», — къыIуагъ КъумпIыл Мурат.

Ащ дакIоу республикэм и ЛIышъхьэ къыхигъэщыгъ цIыфым ифитыныгъэхэмрэ ипшъэрылъхэмрэ ямызакъоу, обществэм ыпашъхьэкIи пшъэдэкIыжь ащ ыхьын зэрэфаер мы документым къызэриушыхьатырэр.

ЕджапIэм гъэхъагъэхэр зэрэщашIыхэрэм, республикэ ыкIи Урысые олимпиадэхэм, зэнэ­къокъухэм, общественнэ щыIа­кIэм чанэу зэрахэлажьэхэрэм апае зэрафэразэр КъумпIыл Мурат къыIуагъ.

Муниципальнэ образование пстэуми ялIыкIо кIэлэеджэкIо 12-мэ Урысыем ипаспорт Адыге­им и ЛIышъхьэ аритыжьыгъ. Я Хэгъэгу шIу алъэгъунэу, загъэчанынэу, ягъэхъагъэхэм ренэу ахагъэхъонэу ныбжьыкIэхэм ар афэлъэIуагъ.

«Тихэгъэгу, тарихъ гъогушхоу ащ къыкIугъэм, дунэе культу­рэм иIахьэу хишIыхьагъэм, гъэсэ­ныгъэмрэ шIэныгъэмрэ алъэныкъокIэ гъэхъэгъэшхоу иIэхэм тарэгушхо. Амал ин дэдэхэр ащ зэриIэхэм тицыхьэ телъ. ЗэкIэми ткIуачIэ зэхэлъэу Урысыер джыри нахь зэтегъэпсыхьагъэ, нахь лъэш зэрэхъущтым тызэ­рэдэлэжьэщтым сицыхьэ телъ», — къыIуагъ КъумпIыл Мурат.

Адыгеим и ЛIышъхьэ кIэлэ­еджакIохэм гущыIэгъу афэхъугъ, мурадэу яIэхэм защигъэгъозагъ, дэгъоу еджэнхэу, шIоу щыIэр зэкIэ къадэхъунэу афэлъэIуагъ. Урысыем игражданин зэрэхъугъэхэр къэзыушыхьатырэ паспортхэр аратыхэ зэхъум Iоф­тхьабзэм хэлэжьагъэх Адыгэ Республикэм и Премьер-министрэ ипшъэрылъхэр зыгъэцэ­кIэрэ КIэрэщэ Анзаур, Къэралыгъо Советым — Хасэм и Тхьаматэ игуадзэу, Урысыем и ЛIыхъужъэу Цэй Эдуард, гъэсэныгъэмрэ шIэныгъэмрэкIэ министрэм ипшъэрылъхэр зы­гъэцакIэу Евгений Лебедевыр.

АР-м и ЛIышъхьэ ипресс-къулыкъу