Урысыем и Мафэ фэгъэхьыгъэ онлайн-программэу ТекIоныгъэм и Музей къыгъэхьазырыгъэм Адыгэ Республикэм щыпсэухэрэр хэлэжьэнхэ алъэкIыщт. Мэкъуогъум и 12-м рагъэкIокIыщт Iофтхьабзэм къыдыхэлъыта­гъэх онлайн-экскурсиехэр, патриотическэ орэдхэм яконцерт, мастер-классхэр, нэмыкIхэри. Ащ пае сайтэу «https://vic­torymuseum.ru/playbill/events/onlayn-prog­ramma-ko-dnyu-rossii/» зыфиIорэм шъуихьан фае.

Программэр онлайн­экскурсиекIэ къызэ­Iуахыщт, ар зыфэгъэ­хьыгъэщтыр Хэгъэгу зэошхом илъэхъан тицIыфхэм лIыхъужъныгъэу зэрахьагъэр ары. Къэралыгъом щыпсэу­хэрэм Щытхъум и Зал, экспозициехэу «Подвиг Армии» ыкIи «Подвиг Народа» зыфиIохэрэр зэрагъэлъэгъунхэ амал яIэщт. ТекIоныгъэм и Музей итарихълэжьэу Александр Михайловым летчикхэм, танкистхэм, разведчикхэм, дзэ командирхэм, джащ фэ­дэу капитанэу Иван Фле­ровым — советскэ дзэмкIэ реактивнэ артиллерием ибатарее иапэрэ командир лIы­хъужъныгъэу зэрахьагъэр Iофтхьабзэм хэла­жьэхэрэм къафиIо­тэщт. 1941-рэ илъэсым Смоленскэ дэжь щыкIогъэ заом тидзэхэм пэщэныгъэ адызезы­хьэгъэ генерал-лейтенантэу Михаил Лукиным игъэ­хъагъэхэм якъэ­бар цIыф­хэм ашIогъэшIэгъоныщт.

Виртуальнэ экскурсием къыдыхэлъыта­гъэу «Поклонная гора» зыфиIорэм тарихъэу пы­лъым ыкIи саугъэт комплексым итамыгъэ­хэм къарыкIырэм цIыф­хэр нэIуасэ фашIыщтых, мы чIыпIэм аущтэу зыкIеджагъэхэр къафаIотэщт. УпчIэу къатыхэрэм джэуапхэр къаритыжьыщт Те­кIоныгъэм и Музей иIофышIэу Алена Волковам.

Проектэу «Главные детские песни 1.0» зыфиIорэм къыдыхэ­лъытагъэу концерт къа­тыщт. Сэнаущыгъэ зыхэлъ кIэлэцIыкIухэм патриотическэ орэдхэр къаIощтых.

Джащ фэдэу 1936-рэ илъэсым агъэуцугъэ советскэ фильмэу «Поколение Победителей» зыфиIорэр онлайн-кинотеатрэм къыгъэлъэгъощт. НэмыкI Iофтхьабзэхэри зэхащэщтых. Денис Горицкэр.

ТекIоныгъэм и Музей испециалист.