ЕджапIэхэм шэн-хэбзакIэ ачIалъхьащт
Адыгеим иеджапIэхэм быракъыр ащаIэтыныр ыкIи гимныр къащаIоныр хабзэ ащыхъун фае.
Ащ фэдэ патриотическэ шэн-хабзэ еджапIэхэм ачIэлъыным икIэщакIо хъугъэ Урысыем просвещениемкIэ и Министерствэ. Мы Iофым Адыгеим иеджапIэхэр мэкIэ-макIэу хэхьэх. Ащ фэдэу мэлылъфэгъум и 25-м Мыекъопэ лицееу N 34-м еджэгъу тхьамафэр УФ-м ыкIи Адыгеим ябыракъхэм якъэIэтынрэ ягимнхэм якъэIонрэкIэ рагъэжьагъ. АР-м гъэсэныгъэмрэ шIэныгъэмрэкIэ и Министерствэ къызэрэщаIуагъэмкIэ, джы тхьамэфэ еджэгъур ащ тетэу рагъажьэзэ ашIыщт.
— Iоныгъом и 1-м къыщегъэжьагъэу джы апэрэ классым къыщыублагъэу кIэлэцIыкIухэр Урысыем итарихъ нэIуасэ фашIыщтых. Ащ фэгъэхьыгъэ методическэ IэпыIэгъухэр УФ-м просвещениемкIэ и Министерствэ зэхигъэуцуагъэх. Ахэм тарихъым фэгъэхьыгъэ Iофыгъохэр къащызэхэфыгъэх, ныбжьыкIэхэм япIункIэ зишIуагъэ къэкIощт чIыпIэхэр къыщыгъэнэфагъэх, — къыIуагъ АР-м гъэсэныгъэмрэ шIэныгъэмрэкIэ иминистрэ игуадзэу Пэрэныкъо Сусаннэ.