КIэлэегъадж, пэщэ шъыпкъ
УкIэлэегъэджэныр, коллектив иным урипэщэныр сыдигъуи псынкIэп. Ау уиIофшIэн шIу плъэгъоу, къыбгот цIыфхэм шъхьэкIэфэныгъэ афэпшIэу улажьэмэ, къыбдэмыхъун ыкIи зэшIомыхын щыIэп. А пшъэрылъ пстэури зэрифэшъуашэу егъэцакIэ непэ зиюбилей хэзыгъэунэфыкIырэ Адыгэ кIэлэегъэджэ колледжым ипащэу Къэгъэзэжь Мурат Нурбый ыкъом.
Мурат Нурбый ыкъор Мыекъуапэ къыщыхъугъ. 1984-рэ илъэсым Адыгэ къэралыгъо кIэлэегъэджэ институтыр къыухыгъ, хьисапымрэ физикэмрэ япхыгъэ сэнэхьатыр зэригъэгъотыгъ. Мы илъэс дэдэм республикэм икъэлэ шъхьаIэ дэт гурыт еджапIэу N 16-м иIофшIэн щыригъэжьагъ, 1989-рэ илъэсым АКъУ-м кIэлэегъаджэу, нэужым педагогическэ факультетым идекан игуадзэу, 1996-рэ илъэсым щегъэжьагъэу естественнэ-хьисап дисциплинэхэмкIэ кафедрэм ипащэу лэжьагъэ. 1993-рэ илъэсым кандидат диссертациер къыухъумагъ, хэутыгъэ 50-м ехъумэ яавтор.
2014-рэ илъэсым Къэгъэзэжь Мурат Адыгэ кIэлэегъэджэ колледжым ипащэу агъэнэфагъ. Ащ щегъэжьагъэу гъэсэныгъэм иучреждение хэхъоныгъэ зэришIыщтым, ыпэкIэ зэрэлъыкIотэщтым ишъыпкъэу дэлажьэ, ащкIэ фызэшIокIыгъэри бэ. Гъэхъагъэу иIэхэм къакIэлъыкIоу щытхъуцIэу «Урысые Федерацием иапшъэрэ профессиональнэ гъэсэныгъэм иIофышIэ гъэшIуагъ» зыфиIорэр, Адыгеим и Къэралыгъо Совет — Хасэм и Щытхъу тхылъ къыфагъэшъошагъэх, джащ фэдэу федеральнэ егъэджэн-методическэ объединениеу «Гъэсэныгъэр ыкIи кIэлэегъэджэ наукэхэр» зыфиIорэм хэт.
Лъытэныгъэшхо зыфэтшIырэ Мурат Нурбый ыкъор! Непэ хэбгъэунэфыкIырэ уиюбилейкIэ тыгу къыддеIэу тыпфэгушIо. Псауныгъэ пытэ уиIэу, лъытэныгъэу къыпфашIырэм къыщымыкIэу, щыIэкIэшIу уиIэу упсэунэу пфэтэIо!
Адыгэ кIэлэегъэджэ колледжым иIофышIэхэр.