Мыекъуапэ. Непэ жъоны­гъуакIэм иапэрэ маф. МэшIокугъогу станцием тытет. Адыгэ Республикэм апэрэу къэкIорэ мэшIокоу «Кавказым иналмэс-налкъут» зыфиIорэр къэсынэу тежэ.

Станцие пчэгум автобусхэр бэу щызэхэтых. Ахэр зыгъэпсэфакIоу республикэм къакIо­хэрэм яжэх, хьакIэхэр къыращэкIынхэм фэхьазырых.

Вокзалым пэблагъэу щыт шхэпIэ цIыкIум дэжь пщынэо макъэ къыщэIу. Адыгэ шхынэу къагъэхьазырыгъэхэр – гуубатхэр, къое хьалыжъор, нэмыкIхэр Iанэхэм атетых. Предпринимателэу Мерэм Бислъан къыщэгъэ пчэныщэм хэшIыкIыгъэ къуаехэр, лы гъэгъугъэхэр ахэм ащы­щых. Самовар кIэракIэм щаир къыщэжъо.

МэшIокум икъэсыгъу. КIэ­лэ ныбжьыкIэхэр вокзалым щызэхэтых, ахэр адыгэ къэ­шъокIо ансамблэу «Абрекхэр» зыфиIорэм щыщых.

МэшIокур къэлъагъо, вокзалым къыщэуцу. ХьакIэхэр бэу перроным къытехьэх, вокзалым сурэтхэр тырахых, журналистэу къадэкIуагъэхэр анахь чаных. ТимэшIоку вокзал илъэси 110-м ехъугъэу щытми, итеплъэ дахэ, хьакIэхэм агу рехьы.

ЗыгъэпсэфакIохэр станцием ипчэгу рагъэблагъэх, шъонтыр­паохэм мэкъэшхоу къагъэIурэм ахэр зыфещэх. «Кавказ, Кавказ» гущыIэр къызэраIорэр зэхэохы. Ощх жъгъэеу къещхырэми къыхэхъо. Ащ емылъытыгъэу кIалэхэм сурэтхэр атырахых.

ЗекIозещэхэр хьакIэхэм къа­хэхьэх, бэщ кIыхьэхэу «розовые», «красные», «коричневые» зытетхагъэхэр агъаIэх, куп-купэу агощыгъэхэ зыгъэпсэфакIохэр къякIуалIэхэу рагъажьэ.

МэшIокум цIыф къинагъэп. Ащ ипащэу Александр къэгъотыгъошIоп.

— МэшIокоу «Кавказым иналмэс-налкъут» зыфиIо­рэм туроператорэу «РЖД Тур-м» епхыгъэу Iоф ешIэ. Апэрэ турэу зэхэтщагъэр нэбгырэ 238-мэ къыхахыгъ. Вагон 13-м ычIыпIэкIэ 19 тыкъызэрэ­кIуа­гъэр. Кавказым щыIагъэхэр цIыфхэм ахэтых. ЯтIонэрэ турым тегъэ­псыхьагъэу путевкэхэр ащэфынхэу зэрэрагъэжьагъэр сэшIэ. Iоныгъом нэс зыгъэпсэфакIохэр зэпымыоу къы­шъуфэтщэщтых, — еIо ащ.

ЗекIохэм кIэлэцIыкIухэр зигъусэхэри ахэтых. Бзылъфыгъэу тыздэгущыIагъэми ипхъо­рэлъф цIыкIу къыздищагъ.

— Екатерина сцIэр. Кавказым сыкъэкIоным бэшIагъэу сыкIэхъопсыщтыгъ. МэшIоку турыр сигуапэу къыхэсхыгъ. Мэфиблым къыкIоцI къэлиблымэ тадэхьащт, экскурсиехэм тахэлэжьэщт. ЧIыпIэ гъэшIэгъонхэр зэдгъэлъэгъущтых, — еIо бзылъфыгъэм.

ЦIыфхэр зэджэжьых, автобусхэм арэтIысхьэх, зекIозещэхэм ахэр къушъхьэм ращажьэх. ХьакIэу къэкIуагъэхэм сыхьати 6 къакIухьащт. «Лэгъо- Накъэ», исп унэхэр, Хьаджыкъо тIуакIэ, псыкъефэххэр арагъэлъэгъущтых. Мыекъуапэ ыуж ахэр Къэбэртэе-Бэлъкъарым ичIыпIэ гъэшIэгъонхэм нэIуасэ афашIыщтых. Мэфиблым къыкIоцI мэщытэу «Чэчэным ыгу», пытэпIэжъэу «Нарын-Кала» (Дагъыстан), къэлэжъэу Дербент, нэмыкIхэри рагъэлъэгъущтых. Зы тхьамафэкIэ Урысыем и Къыблэ ызыныкъо къакIу­хьащт. Мафэрэ заплъыхьащт, чэщыр мэшIокум щырахыщт. ХьакIэхэм Урысыем ичIыпIэ зэфэшъхьафхэм къарыкIыгъэ журналистхэр ахэтыгъэх, ахэм Кавказым иналмэс-налкъутэхэм ядэхагъэ цIыфхэм зэранагъэсыжьыщтыр гъэнэфагъэ. Шъаукъо Аслъангуащ.