Адыгеим и ЛIышъхьэу КъумпIыл Мурат Адыгеимрэ Пшызэ шъолъыррэ я ДиндэлэжьапIэ имуфтиеу Къэрдэнэ Аскэрбый республикэм и Правительствэ зычIэт унэм зэIукIэгъу щыдыриIагъ.

Ащ хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, АР-м лъэпкъ IофхэмкIэ, IэкIыб къэралхэм адыряIэ зэпхыныгъэхэмкIэ ыкIи СМИ-мкIэ и Комитет итхьаматэу Шъхьэлэхъо Аскэр. Респуб­ликэм ипащэ НэкIмазэр зэраухырэмкIэ, БирамымкIэ быслъымэнхэм афэгушIуагъ. КъумпIыл Мурат зэрэ­хи­гъэунэфыкIыгъэмкIэ, Адыгеимрэ Пшызэ шъо­лъыррэ ащыпсэурэ быс­лъымэнхэм я ДиндэлэжьапIи, Мыекъуапэрэ Адыгеимрэ яепархии лъэпкъхэм азыфагу илъ зэгурыIо­ныгъэм игъэпытэн яIахьы­шхо хашIыхьэ.

«ТхьэшIошъхъуныгъэ зи­Iэ цIыфым зекIокIэ пхэндж­хэм защедзые. Быслъымэн, чыристан динхэм япащэхэр обществэр нахь зэкъогъэу­цогъэным, дин, лъэпкъ зэ­гурыIоныгъэм игъэпытэн яшъыпкъэу афэлажьэхэу сэлъытэ. Ар зэкIэми зэдытипшъэрылъ. Мамырныгъэ щыIэу, тызэгурыIомэ ары ныIэп республикэм хэхъоныгъэ ин едгъэшIын, экономикэ, социальнэ те­кIоныгъэхэм тафэкIон зыт­лъэкIыщтыр», — къыIуагъ КъумпIыл Мурат.

НэкIмазэр зэрикIырэм­рэ, Бирамым игъэмэфэ­кIынрэ япхыгъэ Iофыгъохэм пащэхэр атегущыIагъэх.

Къэрдэнэ Аскэрбый быс­лъымэнхэм ацIэкIэ Адыгеим и ЛIышъхьэ «тхьауегъэ­псэу» риIуагъ нэкI зыIыгъхэр зэрэ­хи­гъэIэжьыгъэ­хэм фэшI. Пэ­шIорыгъэ­шъэу къызэрэра­дзагъэмкIэ, нэкI зыIыгъ нэбгы­рэ мин 1,5-м ехъу хагъэIэ­жьыгъ. Мыекъуапэ дэсхэм анэмыкIэу, рес­публикэм имуниципальнэ образованиехэми, нэмыкI шъолъыр­хэми ябыслъы­мэнхэр ащ къекIолIагъэх.

КъумпIыл Мурат къызэ­рэхигъэщыгъэмкIэ, пандемием ыпкъ къикIыкIэ Iоф­тхьэбзабэ Адыгеим пэIу­дзыгъэ шIыкIэм тетэу щы­зэхащагъ. Iофхэм язытет нахьышIу зэрэхъугъэм епхыгъэу джы нахьыбэрэ зэIукIэхэр зэхащэщтых.

АР-м и ЛIышъхьэ ипресс-къулыкъу