ТекIоныгъэм имэшIоку
Тарихъ мэхьанэ зиIэ ретро-мэшIоку гъэкIэрэкIагъэу «ТекIоныгъ» зыфиIорэр Мыекъуапэ имэшIоку гъогу станцие тыгъуасэ къытехьагъ.
Хэгъэгу зэошхом илъэхъан щыIэгъэ мэшIокур шъолъырым къызэрэнэсыгъэм республикэм щыпсэухэрэмкIэ мэхьанэшхо зиIэ хъугъэ-шIагъэу щыт. Зэо хьылъэхэр зыщыкIогъэ мафэ-хэр, тятэжъхэм ялIыблэнагъэрэ ятекIоныгъэрэ ащ тыгу къегъэкIыжьых. ШIэжь мэхьанэ зиIэ Iофтхьабзэм цIыф бэдэдэ къекIолIагъ: ветеранхэр, республикэм ихэбзэ къулыкъухэм ыкIи общественнэ организациехэм ялIыкIохэр, «Юнармием» хэтхэр, Мыекъуапэ итворческэ купхэр, кIэлэеджакIохэр, нэмыкIхэри.
АР-м и ЛIышъхьэу КъумпIыл Мурат ыцIэкIэ Iофтхьабзэм къекIолIагъэхэм шIуфэс гущыIэхэмкIэ закъыфигъэзагъ АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр. Ащ къызэриIуагъэмкIэ, Хэгъэгу зэошхом илъэхъан советскэ зэолIхэм, тичIыпIэгъухэм лIыгъэшхоу зэрахьагъэм итамы-гъэу мы мафэр хъугъэ. Тарихъ мэхьанэ зиIэ мэшIокур Адыгеим апэрэу къызэрэкIуагъэкIэ Темыр-Кавказ мэшIоку гъогум ипащэ зэрэфэразэр къыкIигъэтхъыгъ.
— Заом имэшIо гъогухэр зэпызычыгъэ фронтовикхэр нахь макIэ мэхъу зэпыт. Ау ахэр тыгу елъыфэ, ягугъу тэшIыфэ псаухэу къытхэтых. Адыгеим щыщэу Хэгъэгу зэошхом нэбгырэ мин 80 хэлэжьагъ, нэбгырэ мин 33-м ехъур ащ хэкIодагъ. ЗэкI пIоми хъунэу тичIыпIэгъухэм тынхэр къафагъэшъошагъэх, ахэм ащыщэу нэбгырэ 59-мэ Советскэ Союзым и ЛIыхъужъыцIэ, Щытхъум иорден истепенищ къаратыгъ. Зыфэдэ щымыIэ тинахьыжъхэу республикэм щыпсэухэрэр апсэ емыблэжьхэу щыIэкIэшIу тиIэным фэбэнагъэх. ЛIыхъужъныгъэу зэрахьагъэр тикъэралыгъокIэ пкъэушхоу щыт, къыткIэхъухьэрэ ныбжьыкIэхэм яхэгъэгу шIу алъэгъоу пIугъэнхэмкIэ ахэр непэ дышъэ кIэных, — къыщеIо АР-м и ЛIышъхьэ ишIуфэс тхылъ.
Iофтхьабзэм къекIолIагъэхэр зэкIэ тарихъ чыжьэм ифэмэ-бжымэхэм алъыIэсынхэ алъэкIыгъ. Зэо лъэхъаным тидзэкIолIхэр зэрэзекIощтыгъэхэ мэшIокум зыщагъэгъозэн, вагоным ыкIоцI зыфэдэр зэрагъэлъэгъун амал яIагъ. МэшIокур ыкIи вагонхэр Темыр-Кавказ мэшIоку гъогум имузей иэкспонатых.
МэшIоку гъогухэм культурэмкIэ и Унэ итворческэ купхэм ыкIи Ростов къэралыгъо университетым истудентхэм заом итарихъ мэхьанэ къизыIотыкIырэ концерт къатыгъ. Джащ фэдэу Адыгеим итворческэ купхэри мы Iофтхьабзэм чанэу хэлэжьагъэх. КIАРЭ Фатим. Сурэтхэр А. Гусевым тырихыгъэх.