Пэрытныгъэ зыIыгъхэм Адыгеир ахэхьагъ
2019 — 2021-рэ илъэсхэм зы нэбгырэм телъытагъэу псэупIэ квадрат метрэ пчъагъэу атыгъэмкIэ пэрытныгъэ зыIыгъ шъолъыр 13-мэ Адыгеир ахэхьагъ.
Ащ фэгъэхьыгъэу УФ-м и Правительствэ и Тхьаматэ игуадзэу Марат Хуснуллиным шъолъыр хэхъоныгъэмкIэ правительственнэ комиссием и Президиум изэхэсыгъо къыщиIуагъ.
Адыгэ Республикэм и ЛIы-шъхьэ и Телеграм нэкIубгъо зэрэритхагъэмкIэ, гъэрекIо псэупIэ квадрат метрэ мин 307-рэ республикэм щатыгъагъ. 2020-рэ илъэсым егъэпшагъэмэ, ар проценти 119-рэ мэхъу. Зы нэбгырэм телъытагъэу квадрат метрэ 0,66-рэ атыгъ.
«Мыгъэ псэолъэшIыным республикэм зыщедгъэушъомбгъун тимурад. Хэгъэгум ипащэхэр псэолъэшIыным IэпыIэгъу къыфэхъух. Типшъэрылъыр кризисым пэшIуекIогъэнымкIэ Урысыем и Правительствэ игъоу ылъэгъугъэ хэкIыпIэхэр чанэу къызфэдгъэфедэнхэр ары», — ритхагъ и Телеграм нэкIубгъо КъумпIыл Мурат.
Марат Хуснуллиным пшъэрылъ къыгъэуцугъ бюджет мылъкур зэрэщытэу гъэфедэгъэным, псэолъэшIынымрэ, псэуалъэхэм ягъэцэкIэжьынрэ атегъэпсыхьэгъэ къэралыгъо программэхэм ягъэцэкIэн, псэолъэшIыным IэпыIэгъу егъэгъотыгъэным акIуачIэ нахь зэдырахьылIэнэу.