Адыгеим и ЛIышъхьэу КъумпIыл Мурат Тэхъутэмыкъое районым инароднэ депутатхэм я Совет идепутатхэм Ситуационнэ гупчэм зэIукIэгъу щадыриIагъ.

Мы аужырэ илъэси 5-м хабзэм игъэцэкIэкIо къулыкъухэм районым щызэрахьэгъэ Iофтхьабзэхэм, хабзэм имуниципальнэ къулыкъухэм мы лъэхъаным Iоф зэрашIагъэм ыкIи нэмыкI Iофыгъохэм ахэр атегущыIагъэх.

ЗэIукIэгъум хэлэжьагъэх АР-м и Премьер-­министрэ ипшъэрылъхэр зыгъэцакIэу КIэрэщэ Анзаур, Адыгеим и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, Тэхъутэмыкъое районым ипащэу Шъэо Аскэр, народнэ депутатхэм я Совет итхьаматэу Хьатитэ Алый, нэмыкIхэри.

Адыгеим и ЛIышъхьэ зэрэхигъэунэфыкIыгъэмкIэ, псынкIэу хэхъоныгъэ зышIырэ муниципальнэ образованиехэм Тэхъу­тэмыкъое районыр зэу ащыщ, республикэм хэ­хъоныгъэ зэришIыщт стратегием ащ чIыпIэшхо щеубыты.

«ЧIыпIэ дэгъу зэрэщысыр, социальнэ-экономикэ хэхъоныгъэмкIэ амалышхохэр зэриIэр, инвестициехэр бэу къыхалъхьан зэралъэкIыщтыр районыр ыпэкIэ лъызыгъэ­кIо­тэщт къэкIуапIэхэм ащыщых. Республикэм ипащэхэм яшъыпкъэу акIуачIэ рахьылIэ лъэпкъ проектхэм, къэралыгъо программэхэм, инвестиционнэ политикэм къыдилъы­тэрэ гухэлъышхохэр Тэ­хъутэмыкъое районым щыгъэцэкIэгъэнхэм. ТэркIэ мэхьанэшхо иI районым ихэбзэ къулыкъухэм республикэмрэ му­ниципалитетымрэ яхэбзэ къулыкъухэм зэдэлэжьэныгъэу адыряIэм хагъэ­хъоным», — къыIуагъ КъумпIыл Мурат.

Адыгэ Республикэм и Премьер-министрэ ипшъэ­рылъхэр зыгъэцакIэу КIэ­рэщэ Анзаур зэIукIэгъум къызэрэщиIуагъэмкIэ, 2017-рэ илъэсым къыщегъэжьагъэу 2022-м нэс муниципальнэ образованием имылъку шъхьаIэ сомэ миллиард 20,3-м ехъурэ инвестициехэр къыхалъхьагъэх. А уахътэм къыкIоцI чIыпIэ бюджетым ихахъохэм зыкъаIэтыгъ, сомэ миллион 918,3-рэ ар хъущтыгъэмэ, сомэ миллиарди 2,1-м нэсыгъ. ПсэупIэ квадрат метрэ ­ мин 795,3-м ехъу атыгъ, ныбжьыкIэ унэгъуи 133-рэ унэхэм ачIэхьажьыгъэх. КIэлэцIыкIу ибэхэм зыщыпсэущт унэхэр ягъэгъо­тыгъэнхэм сомэ миллион 79,6-рэ хъурэ субвенциехэр апэIухьагъэх.

ЗэIукIэгъум зэрэщыхагъэунэфыкIыгъэмкIэ, 2019-рэ, 2020-рэ илъэсхэм рес­публикэ мэхьанэ зиIэ гъогухэм ягъэцэкIэжьын сомэ миллион 204-рэ фэдиз муниципалитетым щы­пэIуагъэхьагъ. Лъэпкъ про­ектэу «Щынэгъончъэ ыкIи шэпхъэшIухэм ади­штэрэ гъогухэр» зыфи­Iорэм диштэу 2019-рэ илъэсым къыщегъэжьагъэу 2021-м нэс сомэ миллион 297-м ехъу районым щагъэфедагъ. Автомобиль гъогоу «Инэм — БжыхьэкъоякI» зыфиIорэм дэжь сомэ миллиарди 2,7-м ехъу зытефэщт ­гъогу зэхэкIыпIэм ишIын мыгъэ щаухыщт.

Трансформатори 2 зы­хэт подстанциеу «Ша­п­сыгъ» зыфиIорэм игъэ­кIэжьын аухыгъ. Киловатти 110-рэ зиIэ электролинии ащ пае агъэпсыгъ. Адыгэ Республикэм иминистрэхэм я Кабинет ПАО-у «Россети» зэзэгъы­ныгъэ зэрэдишIыгъэм те­тэу «Инэм», «ИКЕА» зыфиIорэ подстанциехэри агъэкIэжьынхэу рахъухьэ.

Газ станциеу «Новый сад» зыфиIорэм игазрыкIуапIэ, къуаджэу Тэхъутэмыкъуаерэ поселкэу Яблоновскэмрэ апхырыкIыщт газрыкIуапIэм ягъэпсын 2023-рэ илъэсым ехъу- лIэу аухынэу рахъухьэ.

Газ станциеу «Яблоновскэм» игазрыкIуапIэ, поселкэ газрыкIуапIэу ин­дустриальнэ паркэу «Яблоновскэм» нэсыщтыр 2025-рэ илъэсым ехъулIэу атын ямурад.

АР-м и Премьер-ми­нистрэ ипшъэрылъхэр зы­гъэцэкIэрэ КIэрэщэ Ан-заур гектари 194-рэ зэ­лъызыубытырэ промышленнэ шъолъырыр районым зэрэщагъэпсырэм къытегущыIагъ. 2024-рэ илъэсым нэс Адыгэ Республикэм социальнэ-экономикэ хэ­хъоныгъэ зэришIыщт унэе программэм диштэу сомэ миллиард 1,6-рэ, инфраструктурэ бюджет чIыфэхэу сомэ миллион 318-рэ, лъэпкъ проектэу «Предпринимательствэ цIыкIумрэ гурытымрэ» зыфиIорэм диштэу сомэ миллион 252-рэ ащ пае къыхагъэ­кIыщт.

2017-рэ илъэсым къыщегъэжьагъэу районым гу­рыт еджэпIи 2-рэ кIэлэцIыкIу IыгъыпIи 2-рэ щагъэпсыгъэх, джыри гурыт еджэпIи 4 щашIынэу ра­хъухьэ. «Точка роста» зы­фиIохэрэм афэдэ гупчи 7 агъэпсыгъ. Къуаджэу Тэхъутэмыкъуаерэ поселкэу Инэмрэ псауныгъэр зыщагъэпытэрэ физкультурэ комплексхэр къадэтэджагъэх, атлетикэ он­тэгъум зыщыпылъыщтхэ спортзали агъэпсыгъ.

Муниципальнэ образованием ипащэхэм яIофшIэн зэрэзэхащэрэми мы зэ­IукIэгъум шъхьафэу щытегущыIагъэх. АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Хъоткъо Саныет зэрэхи­гъэу­нэфыкIыгъэмкIэ, нэбгырабэ районым исхэм ащыщэу физкультурэмрэ спортымрэ апылъ, волонтер IофшIэнми чанэу хэлажьэх. ЦIыфхэм псэукIэ амалэу яIэр нахьышIу шIы­гъэнымкIэ, унэе унэхэм ягъэпсынкIэ, тыкъэзыуцу­хьэрэ дунаир къэухъумэгъэнымкIэ, цIыфхэм хахъоу яIэм зыкъегъэIэты­гъэнымкIэ гъэхъэгъэ горэ­хэр районым щашIыгъ. Фэтэрыбэу зэхэт унэхэм ятIупщынкIэ, предпринимательствэ цIыкIумрэ гурытымрэ апыщагъэхэр нахьыбэ шIыгъэнымкIэ Iофыгъо зэе-тIуаехэри щыIэх.

КъумпIыл Мурат депутатхэм анаIэ тыраригъэ­дзагъ предпринимательствэ цIыкIумрэ гурытымрэ апылъхэр нахьыбэ ашIын, бизнесым грантхэмкIэ IэпыIэгъу рагъэгъотын, псау­ныгъэм икъэухъумэнкIэ IофышIэхэу ящыкIагъэхэр заявкэхэр атызэ рагъэ­джэн­хэ зэралъэкIыщтым.

Муниципалитетым ипащэхэмрэ депутатхэмрэ республикэм ихэбзэ къулыкъухэм зэдэлэжьэны­гъэу адыряIэр тапэкIи агъэпытэным зэрэфэхьазырхэр къа­Iуагъ. АР-м и ЛIышъхьэ ипресс-къулыкъу Сурэтыр А. Гусевым ты­рихыгъ.