Хэгъэгу зэошхом ТекIоныгъэр къызыщыдахыгъэм и Мафэ ипэгъокIэу Адыгэ РеспубликэмкIэ Народнэ фронтым илIыкIохэм патриотическэ мэхьанэ зиIэ Iофтхьабзэхэр зэхащэнхэр шэнышIу афэхъугъ.

Общественникхэм шIэжь мэхьанэ зиIэ чIыпIэхэм шIыхьафхэр ащызэхащэх, ветеранхэм аIокIэх, къыткIэхъухьэрэ лIэуж­хэм я Хэгъэгу шIу алъэгъоу пIугъэнхэм анаIэ тырагъэты. Мы мафэхэм станицэу Смоленскэм километрэ заулэкIэ пэ­чы­жьэу щыт саугъэтым дэжь шIы­хьаф щырагъэкIокIыгъ.

— 2018-рэ илъэсым бжыхьэм Хэгъэгу зэошхом хэкIодэгъэ советскэ дзэкIолIхэр зыщагъэтIылъыгъэхэ чIыпIэ къэдгъотыгъ. Ар къушъхьэхэмкIэ нахь дзы­гъэу, псэупIэхэм ыкIи гъогухэм апэчыжьэу щытыгъ, бгъэкъэбзэн ыкIи бгъэцэкIэжьын фэягъ. 2019-рэ илъэсым Те­кIоныгъэм и Мафэ ихэгъэунэфыкIын ехъу­лIэу саугъэтым тет шIэжь тамы­гъэр дгъэкIэжьыгъэ, къыпэIулъ чIыпIэр зэтедгъэпсыхьагъ. Ащ къыщегъэжьагъэу псэуалъэм ты­наIэ тет, тылъэплъэ, — къы­Iуагъ ОНФ-м ишъолъыр къутамэ иштаб хэтэу Иван Партноим.

ШIэжь чIыпIэм дэжь Iулъ хэ­кIыр ныбжьыкIэхэм Iуащыгъ, джащ фэдэу саугъэтыр агъэцэ­кIэжьыгъ.

— Тикъэралыгъо итарихъ къэ­тыухъумэныр, ар къыткIэхъу­хьэрэ лIэужхэм ядгъэшIэныр, къэбар нэпцI зыгъэIухэрэм та­пэуцужьыныр непэ пшъэрылъ шъхьаIэх. Ащ пае ныбжьыкIэ- хэм Iоф адэтшIэн ыкIи я Хэ-гъэгу шIу алъэгъоу пIугъэнхэм тынаIэ тедгъэтын фае, — къы­Iуагъ Урысыем и ЛIыхъужъэу Цэй Эдуард.