Партиеу «Единэ Россием» ипроектэу «Къэлэ щыIакIэр» зыфиIорэм къыдыхэлъытагъэу фэтэрыбэу зэхэт унэхэм ящагухэу икIыгъэ илъэсым Мыекъуапэ щызэтырагъэпсыхьагъэхэм язытет ауплъэкIу.

Къалэм идепутатхэм, муниципальнэ образованием псэупIэ-коммунальнэ хъызмэтымкIэ ыкIи къэ­лэгъэпсынымкIэ и ГъэIорышIапIэ, шъолъыр общественнэ зыгъэIорышIэ­жьыпIэхэм (ТОС) ялIыкIо­хэр зыхэхьэгъэхэ IофышIэ ку­пым пэщэныгъэ дызэрихьагъ федеральнэ партийнэ проектым АР-мкIэ икоординаторэу Джары­мэкъо Азмэт.

УплъэкIун Iофтхьабзэ­хэм къахиубытагъэх икIыгъэ илъэсым зэтырагъэ­псыхьэгъэ щагухэу мыщ фэдэ чIыпIэхэм ащыIэхэр: ур. Железнодорожнэр, 158-р, ур. я 2-рэ Дубзаводскоир, 1-р, Юннатхэм яурам, 2/В-р ыкIи ур. Юбилейнэр, 2/А-р.

Фэтэрыбэу зэхэт унэхэм ащыпсэухэрэм къызэрэхагъэщыгъэмкIэ, зэ­хъокIыныгъэшIоу ящагухэм афэхъугъэм лъэшэу кIэгу­шIух. Подряднэ организациеу IофшIэнхэр резыгъэ­кIокIыгъэхэм иIофшIакIэ цIыфхэр ыгъэрэзагъэх. Ащ дакIоу ахэм ежь яшIоигъо­ныгъэкIэ ящагухэм ягъэ­кIэрэкIэн лъагъэкIотагъ: къэгъагъэхэр зыдэтыщт чIы­пIэхэм ахагъэхъуагъ, чъыгхэр ыкIи чъыгжъыехэр щагъэтIысхьагъэх.

Урамэу Юбилейнэм тет кIэлэцIыкIу джэгупIэм щагъэуцугъэ оборудованием хэкъутыкIыгъэ пкъыгъохэр иIэхэу комиссием къыхигъэщыгъ. Заводэу ар къэзышIыгъэм илажьэкIэ дагъо иIэу специалистхэм загъэунэфыкIэ, организациеу IофшIэнхэр резыгъэ­кIокIыгъэм ар зэблихъу­жьыщт, арэущтэу къызычIэмыкIыкIэ агъэцэкIэжьыщт.

— Партием хэтхэмкIэ щагухэм язэтегъэпсы­хьан­кIэ IофшIэнхэр зэрэрагъэ­кIокIыгъэм изытет тэуп­лъэкIу. Лъэпкъ проектэу «ПсэупIэр ыкIи къэлэ щы­IэкIэшIу гъэпсыгъэныр» зыфиIорэм хэхьэ партием пхырищырэ проектэу «Къэлэ щыIакIэр». Ащ игъэцэкIэн Адыгеим и ЛIышъхьэу КъумпIыл Мурат зэпымыоу ышъхьэкIэ лъэплъэ. БлэкIыгъэ илъэс­хэм щагухэм язэтегъэпсы­хьанкIэ IофшIэкIэ амалэу дгъотыгъэр къызфэдгъэфедэзэ, цIыфхэм яшIошI­хэр къыдыхэтлъытэхэзэ ди­зайн-проектхэр къыхэтэ­хых, екIолIакIэхэр къыфэтэгъотых. ХэзгъэунэфыкIымэ сшIоигъу къэлэдэс­хэм чанэу амакъэ зэратырэм имызакъоу, акIуачIэ­кIэ мы IофшIэнхэм къа­зэ­рэхэлажьэхэрэр, — къы­Iуагъ Джарымэкъо Азмэт.