Хэгъэгушхом ыкIи адыгэ лъэпкъым и ЛIыхъужъ-жъогъуибл ацIэхэр ныбжьырэу дышъэ хьарыфхэмкIэ тхыгъэхэу шIэ­жьым къыхэнагъэх. Ахэм Хэгъэгур нэкоу аухъумагъ, мамырныгъэр, шъхьафитныгъэр тагъэгъотыжьыгъ. Тщыгъу­пшэхэрэп. Ягугъу тэшIы, тэгъэлъапIэх.

Андырхъое Хъусен

Гъэтхапэм и 2-м 1920-рэ илъэсым Шэуджэн районымкIэ ­къуаджэу Хьакурынэхьаблэ ­къы­щыхъугъ.

Къыблэ зэуапIэм ия 18-рэ дзэ ия 136-рэ щэрыокIо дивизие ия 733-рэ полк иполитрукыгъ.

СССР-м и Апшъэрэ Совет и Президиум и УнашъокIэ гъэтхапэм и 27-м 1942-рэ илъэсым младшэ политрукэу Андырхъое Хъусен зыфэхыгъэ уж «Советскэ Союзым и ЛIыхъужъ» цIэ лъапIэр къыфагъэшъошагъ.

Ацумыжъ Айдэмыр

1912-рэ илъэсым Краснодар краимкIэ къалэу Шъачэ и ПсышIопэ район ит къуаджэу ШэхэкIэй къыщыхъугъ.

СССР-м и Апшъэрэ Совет и Пре­зидиум иунашъокIэ гъэтхапэм и 31-м 1943-рэ илъэсым командованием пшъэ­рылъэу къыгъэуцугъэр дэгъу дэдэу зэригъэцэкIагъэм ыкIи а уахътэм псэемыблэжьныгъэу, лIыгъэу къыхэфагъэм апае адыгэ кIалэу Ацумыжъ Айдэмыр, зэошхом зыхэкIодэгъэ уж, щытхъуцIэу «Советскэ Союзым и ЛIыхъужъ» зыфиIорэр къыфаусыгъ.

Бжыхьакъо Къымчэрый

АдыгеимкIэ Теуцожь районым ит къуаджэу Лъэустэнхьаблэ шэкIогъум и 15-м 1919-рэ илъэсым кыщыхъугъ.

СССР-м и Апшъэрэ Совет и Президиум и УнашъокIэ зэо пшъэрылъэу командованием къыфигъэуцугъэхэр IэпэIэсагъэ ыкIи гуетыныгъэшхо хэлъэу зэрэзэшIуихыгъэхэм ыкIи лIыгъэ-цIы­фыгъэшхоу къыхэфагъэм апае гвардием истаршэ лейтенантэу Бжыхьакъо Къымчэрые дзэ щытхъуцIэу «Советскэ Союзым и ЛIыхъужъ» зыфиIорэр къы­фагъэ­шъошагъ.

Къош Алый

Адыгэ Республикэм и Кощхьэ­блэ районкIэ къуаджэу Блащэ­псынэ Iоныгъом и 1-м 1922-рэ илъэсым лэжьэкIо унагъо къыщыхъугъ.

СССР-м и Апшъэрэ Совет и Президиум и УнашъокIэ Iоныгъом и 13-м 1944-рэ илъэсым нэмыц-техакIохэм зэошхоу тикъэралыгъо къырашIылIагъэм изэо пшъэрылъ къин зэфэшъхьафхэр пыIухьанчъэу, командованием къыфи­шIырэ пшъэрылъым тетэу зэрэщызэшIуи­хыгъэхэм ыкIи лIыгъэ инэу фронтым щызэрихьагъэм апае ефрейторэу Къош Алый щытхъуцIэу «Советскэ Союзым и ЛIыхъужъ» къыфаусыгъ.

Нэхэе Даут

ШэкIогъум и 27-м 1917-рэ илъэ­сым АдыгеимкIэ Теуцожь районым ит къуаджэу Очэ­пщые имэкъумэщышIэ­-лэжьэ­кIо унагъо къыщыхъугъ.

СССР-м и Апшъэрэ Совет и Президиум и УнашъокIэ щытхъу хэлъэу коман­дованием къыфишIыгъэ зэо пшъэрылъхэр зэригъэцэкIагъэм ыкIи щысэтехыпIэ лIыблэнагъэу къыгъэлъэгъуагъэм апае майорэу Нэхэе Даутэ цIэ лъапIэу «Советскэ Союзым и ЛIыхъужъ» къыфагъэ­шъошагъ.

Тхьагъушъэ Исмахьил

Гъэтхапэм и 17-м 1920-рэ ­илъэсым Краснодар краимкIэ ТIопсэ районым ит къуаджэу Кодэ­щ­хьапIэ къыщыхъугъ.

СССР-м и Апшъэрэ Совет и Президиум и УнашъокIэ чъэпыогъум и 25-м 1943-рэ илъэсым псэемыблэжьныгъэу, лIыгъэу къалэу Канев дэжь Днепрэ икIыгъэнымкIэ (зэпырысыкIынымкIэ) ыкIи мы чIыпIэу аштагъэм зытырагъэпытыхьанымкIэ къыхэфагъэм апае лей­тенантэу Тхьагъушъэ Исмахьилэ Хьалал ыкъом щытхъуцIэу «Советскэ Союзым и ЛIыхъужъ» къыфаусыгъ.

ШIуцIэ Абубэчыр

1912-рэ илъэсым Теуцожь рай­оным ит къуаджэу Пэнэхэс имэкъумэщышIэ унагъо къыщыхъугъ.

СССР-м и Апшъэрэ Совет и Президиум и УнашъокIэ мэлылъфэгъум и 20-м 1945-рэ илъэсым командованием зэо пшъэрылъ инэу къыфигъэуцугъэр зэригъэцэкIагъэм, лIыгъэу, щэIагъэу, псэемыблэжьныгъэу зэрихьагъэм япэсыгъэу краснофлотцэу ШIуцIэ Абубэчыр щытхъуцIэ лъагэу «Со­ветскэ Союзым и ЛIыхъужъ» зыфиIорэр къыфа­гъэшъошагъ.

Мамырыкъо Нуриет.