Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу блэкIыгъэ илъэсым Мыекъуапэ щагъэцэкIэжьыгъэ гъогу Iахьхэм язытет шъолъыр комиссием ыуплъэкIугъ.

Шъугу къэдгъэкIыжьын, лъэпкъ проектым къыды­хэлъытагъэу 2021-рэ илъэсым республикэм икъэлэ шъхьаIэ игъогу чIыпIэ 18-мэ гъэцэкIэжьынхэр ащыкIуагъэх, ахэм ащыщэу 10-р ары мы мафэхэм ауплъэ­кIугъэхэр.

Комиссием хэтхэр урамхэу Герценым, Гагариным, Гончаровым, Ворошиловым ацIэ зыхьыхэрэм, Солнечнэм, Новэм, Привокзальнэм, нэмыкIхэм ащыIагъэх. Гъогухэм атыралъхьэгъэ асфальтым, лъэсрыкIо зэпырыкIыпIэхэм, гъогу тамы­гъэ­хэм язытет зэрагъэшIагъ, ащ къыкIэлъыкIоу зэфэхьысыжьхэр ашIыгъэх.

Гъогу Iахьи 5-мэ хэукъоныгъэ ащагъэунэфыгъэп. Адрэхэм щыкIагъэхэр яIэхэу комиссием къыхигъэ­щыгъ, джы подрядчикым ежь имылъкукIэ ахэр дигъэзыжьынхэ фае. Лъэпкъ проектэу «Щынэгъончъэ ыкIи шэпхъэшIу­хэм адиштэрэ гъогухэр» зыфиIорэр республикэм зэрэщагъэцакIэрэм тапэкIи шъолъыр комиссиер лъыплъэщт, щыкIагъэхэр дагъэзыжьынхэм ынаIэ тыри­гъэтыщт.