Урысыем и Мафэ ипэгъокIэу
Урысые къэралыгъо телерадиокомпанием патриотическэ орэдхэм ятелевизионнэ марафон-фестивалэу «Родинэр къызщежьэрэр» зыфиIорэр регъэкIокIы.
Ар едзыгъуищэу зэхэт. Апэрэр Урысыем ишъолъырхэм ащэкIо. АдыгеимкIэ фестивалым хэлажьэхэрэм адэлажьэрэр Къэралыгъо телерадиокомпаниеу «Адыгеир» ары. Илъэси 10-м къыщыублагъэу илъэс 35-м нэс зыныбжьхэр ары фестиваль-марафоным хэлэжьэнхэу фитыныгъэ зиIэхэр. Шъолъыр едзыгъом творческэ купхэу, ансамблэхэу, орэдыIохэу, хорхэу — фестивалым хэлажьэхэрэм ащыщхэу ясэнаущыгъэкIэ анахь дэгъоу къыхагъэщыхэрэр Къыблэ шъолъырым щыкIощт ятIонэрэ едзыгъом хэлэжьэщтых. Ащ пхырыкIыхэрэр ящэнэрэ едзыгъом, зэрэ Урысыеу анахь дэгъоу къащыхагъэщыгъэхэм ахэтхэу, Урысыем и Мафэ, мэкъуогъум и 12-м, дунэе хъытыум, платформэу «Смотрим.ру» зыфиIорэм щыкIощт концертым хэлэжьэщтых.
ХэгъэунэфыкIыгъэн фаер Урысыем щыпсэурэ цIыф лъэпкъ зэфэшъхьафхэм абзэкIэ патриотическэ орэдхэр къэзыIохэрэр фестивалым хэлажьэхэмэ хъущтхэу шапхъэхэм зэрадиштэрэр ары. АдыгабзэкIи урысыбзэкIи къаIорэ орэдхэу хэгъэгум, республикэм, лIыхъужъныгъэм афэгъэхьыгъэхэр ролик техыгъэхэу фестивалым хэлажьэхэрэм Къэралыгъо телерадиокомпаниеу «Адыгеим» иэлектроннэ почтэу gtrkady-geya@yandex.ru зыфиIорэм къагъэхьых, орэдэу къаIорэм ыцIэ, орэдышъор ыкIи гущыIэхэр зиехэр, купэу е нэбгырэу къэзыIорэм узэрафытеон плъэкIыщт телефонхэр, email-хэр зэрытхэгъэ тхылъхэр ахэм ягъусэх. Адыгеим ирайонхэм ямуниципальнэ псэупIэхэм культурэмкIэ къулыкъоу япхыгъэхэр мы Iофтхьабзэм хэщагъэхэу сэнаущыгъэ зыхэлъ ныбжьыкIэу яIэхэр зэкIэ марафоным хэгъэлэжьэгъэнхэмкIэ IэпыIэгъу къафэхъух. ИскусствэхэмкIэ кIэлэцIыкIу еджапIэхэм, колледжхэм ащеджэхэрэр, культурэм иунэхэу чылэхэм адэтхэм яорэдыIо купхэм ахэтхэр, республикэм щызэлъашIэрэ творческэ купхэр марафоным чанэу хэлажьэх. ДжырэкIэ ролик 50-м къехъу къэралыгъо телерадиокомпанием иэлектроннэ почтэ къагъэхьыгъах. ОсэшI купым анахь дэгъухэр 10-м къемыхъоу къахигъэщынхэр ипшъэрылъ.
Мэлылъфэгъум и 30-м нэс фестиваль-марафоным ишъолъыр едзыгъо Адыгеим щыкIощт, арышъ, къыкIэлъыкIорэ тхьамафэм икIэух нэс техыгъэ роликхэр телевидением иэлектроннэ почтэ шIоигъоныгъэ зиIэхэм къагъэхьын алъэкIыщт.
Тэу Замир.