Шъоущыгъу уз зиIэ кIэлэцIыкIуи 130-рэ тиреспубликэ щэпсэу. Къихьэгъэ илъэсым ищылэ мазэ КъумпIыл Мурат эндокринологхэу Адыгеим Iоф щызышIэхэрэр зеугъоихэм, унагъохэу шъоущыгъу уз зиIэ кIэлэцIыкIухэр зэрысхэм IэпыIэгъу зэрафэхъущтхэр къыIогъагъ.

«Фристайл Либре» зыфиIорэ датчикхэу шъоущыгъоу лъым хэлъыр зэпымыоу къэзыгъэлъагъохэрэр Адыгеим къыIукIагъэх. ЛIышъхьэм иунашъокIэ республикэм ибюджет а аппаратхэм апае сомэ миллион 18,7-рэ къыхагъэкIыгъ. Шъоущыгъу уз зиIэ кIэлэцIыкIухэм зэкIэми ахэр ыпкIэ хэмылъэу аратыщтых. Адыгеим икIэлэцIыкIу клиническэ сымэджэщ педиатриемкIэ иотделение ипащэу Юлия Корчагинам кIэлэцIыкIухэм ыкIи ны-тыхэм ацIэкIэ ЛIышъхьэм зэрэфэразэхэр къыIуагъ.

Аужырэ лъэхъаным кIэлэцIыкIухэм а узыр нахьыбэрэ къахагъэщы зэрэхъугъэри къыкIигъэтхъыгъ. Ащ лъапсэ фэхъурэр зэпахырэ узхэу илъэс зэкIэлъыкIохэм къяутэкIыгъэхэр арэу къеIо. ИкIыгъэ илъэсым изакъоу кIэлэцIыкIу 26-мэ шъоущыгъу узыр яIэ хъугъэ, щылэ мазэм нэбгыритIу ахэм къа­хэхъуагъ.

Датчикхэм якъэгъотын Адыгеим ипащэхэм апшъэ зэрэралъхьажьыгъэм сабый сымаджэ зиIэ унэгъохэр ыгъэгушIуагъэх, IэпыIэгъу зэрарагъэгъотыгъэр игъо шъыпкъэу алъытагъ. Приборхэр Iэзэгъу уцхэм ягъусэхэу аратыжьыщтых. (Тикорр.).